Стратегијата на НАТО за одвраќање и одбрана мора да биде придружена со правилна комуникација во и надвор од оперативната зона. Секој од нас има улога во спроведувањето на комуникацијата кон домашната публика и кон сојузниците, порача денеска началникот на Генералштабот на Армијата, генерал потполковник Васко Ѓурчиновски на затворањето на НАТО конференцијата за комуникатори, чиј домаќин оваа година е Северна Македонија.
Следното нешто што би сакал да го споменам овде е огромната важност на нешто што ја промени сликата на бојното поле, и таа слика е замаглена и не може лесно да се препознае во споредба со конвенционалните воени операции од минатото. Тоа се операциите од областа на комуникациите, додава Ѓурчиновски.
Армијата и Министерството за одбрана, како што нагласи тој, интензивно работат на развој и подобрување на способностите во областа на стратешките комуникации со цел да се зголеми ефикасноста на комуникациите согласно доктрината за комуникации на НАТО.
Денес можеме да елаборираме како се менува информациската средина како резултат на хибридните операции исклучиво преку лекции од војната меѓу Русија и Украина. Верувам дека ова е пресвртната точка во подобрувањето на стратешкиот концепт за комуникации на НАТО во новата деценија преку важноста на поимот здруженост на средствата, начините и стратешките цели на сојузниците, заклучи Ѓурчиновски.
На конференцијата која беше отворена вчера во Националната филхармонија, премиерот Димитар Ковачевски и министерката за одбрана Славјанка Петровска порачаа дека комуникациите и информациската сфера не биле никогаш поважни за безбедноста и стабилноста, како и дека транспарентноста е најдоброто оружје во борбата против лажните вести.
НАТО конференцијата за комуникатори е најголемата годишна конференција за комуникатори во Алијансата.
Годинава, домаќин на Конференцијата е Северна Македонија, а на истата учествуваа околу 300 лица. Во рамки на конференцијата беа организирани неколку панели посветени на стратегиските комуникации.
