Министерката за труд и социјална политика, Јованка Тренчевска денеска го посети специјализираното советувалиште за жени и девојки жртви на родово засновано и семејно насилство и нивните деца, ЕХО – Штип. На настанот беа присутни и претставници на меѓународната организација УН ВОМЕН и Асоцијацијата за здравствена едукација и истражување – ХЕРА, со чија поддршка се воспостави ова специјализирано советувалиште. Министерката Тренчевска вели дека од отворањето на советувалиштето за нецела година, за бесплатна правна помош и психо-социјална поддршка се обратиле 176 жртви на насилство.
Борбата против насилството мора да биде постојана и преку разни форми на помош и поддршка на жртвите на насилство, заеднички да се спротивставиме со цел негово целосно сузбивање, рече министерката Тренчевска.
Таа посочи дека од голема важност е воспостaвувањето на вакви советувалишта во што поголем број и опфат на сите плански региони затоа што, како што рече, на тој начин се овозможува тие да бидат блиски и достапни до граѓаните односно жртвите на насилство.
Заложбата на Владата и Министерството за труд и социјална политика, и по ратификацијата на Истанбулската конвенција и донесувањето на Законот за спречување и заштита врз жените и семејното насилство е проширување на сервисите за жртвите на насилство, но исто така од големо значење е и воспоставување на сервиси кои ќе работат и со сторителите на семејно насилство, затоа што семејното насилство е комплексен проблем, посочи Тренчевска.
Најновите податоци со кои располага Министерството за труд и социјална политика на државно ниво во периодот од јануари до јуни 2022 година, говорат дека официјално се евидентирани 662 случаи на семејно насилство.
Според нашите податоци собрани од 30-те меѓуопштински центри за социјална работа во овој период се евидентирани 662 нови жртви на семејно насилство, од коишто 463 се жени, 116 мажи жртви, деца имаме 83. Најбројна форма на насилство во овој период е психичкото насилство кај 469 жртви, физичко насилство имаат пријавено 350 жртви, економско насилство од 12 жртви и сексуално насилство од две жртви. Бројот и услугите обезбедени за жртвите имаме психосоцијална поддршка обезбедено за 662 жртви, правна помош 457 жртви, сместување во засолниште за 28 жртви, а бројот на жртви на семејно насилство коишто оствариле парично право од социјална заштита согласно Законот за социјална заштита е обезбедена за 31 жртва, вели Тренчевска.
Таа посочи дека и во делот на предложените привремени мерки за заштита од семејно насилство до судовите од страна на Центрите за социјална работа имаат 907 предложени привремени мерки за заштита, а изречени привремени мерки за заштита од страна на судовите се 769. Во однос на бројот на сторители од 603 сторители 543 се мажи сторители на насилство, а, како што вели Тренчевска, во 50 случаи имаме жени сторители на насилство.
Во изминатите 10 месеци ЕХО обезбедила над 200 специјализирани советувалишни услуги со техничка и менторска поддршка на ХЕРА и со финансиска поддршка од Европската Комисија, обезбедена преку македонската канцеларија на UN Women.
ХЕРА посветено работи на развивање на капацитетите на локалните даватели на услуги, за тие да можат да им подадат рака на жените и децата што преживеале насилство. Меѓу нив се и жени и девојки со попреченост, како и жени и девојки од рурални средини кои најверојатно не би можеле да добијат помош доколку таа не е локално достапна. Се стремиме кон тоа ваквите услуги да се бесплатно достапни за жените и девојките низ целата земја, во што клучни се мултисекторските тимови и соработката меѓу државниот и граѓанскиот сектор,нагласи Елизабета Божиноска, програмска директорка на ХЕРА.
Весна Ивановиќ-Кастаред, раководителката на канцеларијата на UN Women во Скопје, ја истакна важноста од темелното спроведување на Истанбулската конвенција и напорите што оваа организација ги прави во нашата земја. Според неа, активностите на ова тело на ОНза родова еднаквост и зајакнување на жените се фокусираат на обезбедување поддршка за граѓанскиот сектор за да може да се исправи пред предизвиците што ги налагаат самата меѓународна конвенција како и обврската на државата да ја спроведе истата. Ова, вели, подразбира и обезбедување одржливост на ваков вид специјализирани советувалишта за кои потребата е повеќе од очигледна.
Жените жртви на насилство треба да ја добијат помошта која им е итно неопходна, да знаат дека има каде да се обратат, да бидат заштитени и да добијат совет и поддршка. Затоа постоењето на вакви центри и обучен кадар е од суштинско значење. Во исто време работиме и на подигнување на свеста дека било која форма на насилство врз жените е неприфатливо кршење на човековите права, и не треба да се толерира. Телото на ОН за родова еднаквост и зајакнување на жените во соработка со сите партнери продолжува да пружа поддршка за спроведување на Истанбулската конвенција, изјава Весна Ивановиќ-Кастаред
Овие бесплатни специјализирани услуги се овозможени преку проектот „Обезбедување бесплатна правна помош и психосоцијална поддршка за најмалку 200 жени припаднички на малцинствата и ранливите групи.
Потреба за вакви услуги постои, заради што е исклучително важно да се обезбеди нивната одржливост. Нашите услуги ги користат не само жени од Штип, туку и од околните места во регионот. Работиме и со лица со попреченост, при што спроведуваме посебен протокол за работа, како и со лица од локалните малцински заедници, изјава Бети Пеева од ЕХО-Штип.
Во текот на оваа година, ХЕРА, преку неколку специјализирани обуки и со постојана менторска поддршка, работи на развивање на капацитетите на ЕХО, заради обезбедување висококвалитетни и стандардизирани услуги.
Едукативно-хуманитарната организација ЕХО – Штип повеќе од 20 години работи на обезбедување поддршка на жени и девојки жртви на родово засновано и семејно насилство, а од ноември минатата година успешно раководи и со ова специјализирано советувалиште.
