Во организација на Женевскиот центар за управување со безбедносниот сектор (ДЦАФ) денеска во Скопје ќе се одржи Годишна конференција посветена на реформите во безбедносниот и разузнавачкиот сектор во Република Северна Македонија.
Како што соопшти организаторот на собирот, Годишната конференција е настан на високо ниво во рамките на „Програмата за реформи во разузнавачкиот и безбедносниот сектор во Република Северна Македонија (2021-2026)“, имплементирана од страна на ДЦАФ, а финансирана од Европската Унија, Швајцарија, Холандија и Шведска.
На конференцијата е најавено воведно обраќање на претседателот на Собранието, Талат Џафери и на евроамбасадорот Дејвид Гир.
На Панелот насловен „Реформите во разузнавачкиот и безбедносниот сектор во Северна Македонија – тековни достигнувања, останати предизвици и идни приоритети“ е најавено учество на министрите за внатрешни работи и за одбрана, Оливер Спасовски и Славјанка Петровска, на претседателот на собраниската Комисијата за надзор на АНБ и АР, Љупчо Пренџов и на директорите на Агенцијата за национална безбедност, Виктор Димовски и на Агенција за разузнавање, Еролд Муслиу.
Учесниците на овој панел ќе се осврнат на тековните достигнувања и останатите предизвици преку обезбедување критички размислувања за правната, политичката и институционалната рамка поврзана со реформата на разузнавачкиот и безбедносниот сектор во земјава, вклучително и Законот за следење на комуникациите и ќе дадат свое видување за клучните приоритети на кои треба да се фокусираат идните реформи во нивните сектори.
На вториот панел, пак, насловен „Интеграција во ЕУ и добро управување во разузнавачкиот и безбедносниот сектор“ ќе се обратат претседателот на собраниската Комисија за надзор над спроведување на мерките за следење на комуникациите, Игор Јанушев, директорот на ОТА, Зоран Ангеловски, јавната обвинителка Спасенка Андонова, професорката на Факултетот за безбедност – Скопје, Фросина Ташевска-Ременски и Димитар Николовски од ЕВРОТИНК -Центар за европски стратегии.
На овој панел ќе стане збор за реформите од перспектива на барањата на ЕУ за членство (особено поглавјата 23 и 24), улогата на граѓанското општество во унапредувањето на реформите во разузнавањето и безбедноста и ќе се осврне на изгледите за интеграција во Унијата од безбедносен агол.
– Настанот има за цел, преку интерактивни панел дискусии, да понуди платформа за видливост, форум за дискусија и можност за запознавање со напредокот, достигнувањата и актуелните предизвици во реформските процеси во безбедносниот и разузнавачкиот сектор во Република Северна Македонија, како и барањата за поодговорен и поефективен безбедносен и разузнавачки сектор кои произлегуваат од преговорите со ЕУ, посочуваат организаторите.
На Конференцијата е најавено присуство на приближно 100 до 120 гости од земјава од различни сектори, вклучително и пратеници, собраниски персонал, претставници од Владата, МВР, МО и Армијата, судии, јавни обвинители, како и претставници на разузнавачки и безбедносни агенции, на партнери на ДЦАФ, на амбасади и меѓународни организации, на граѓански организации, медиуми и на академската заедница.
