Бизнисот апелира Собранието што поскоро да ги усвои антикризните мерки што ги предложи Владата. Во собраниската Комисија за финансирање и буџет, покрај мерките за директна финансиска помош кон одредени категории на граѓани, во место тапка и помошта за стопанството како што анализираше Цивил медиа, со која се очекува да се стабилизира ценовниот удар на енергенсите како инпут во производството.
Од Стопанската комора на Северна Македонија за „Цивил медиа” велат дека остануваат на официјалниот ставот изнесен од извршниот директор на комората, Антони Пешев според кого директните средби со компаниите покажуваат дека енергетската криза има силно влијание врз конкурентноста на македонската економија. Воедно, како што додава Пешев, компаниите тешко ја одржуваат ценовната ликвидност на своите производи и услуги на странските, но и на домашниот пазар.
-За да се одржат домашната економија и конкурентноста на домашните производи и услуги, и дома и во странство, но и за да ги зачуваат работните места, компаниите ја очекуваат поддршката од Владата, која Собранието треба да ја изгласа што поскоро, вели Пешев.
Сличен став, за „Цивил медиа“ сподели и претседателот на Сојузот на стопанските комори, Трајан Ангеловски.
-Не навлегуваме во политички одлуки дали некој ќе блокира или не, но би сакале мерките да се изгласаат што поскоро, вели Ангеловски.
И од Стопанската комора и од Сојузот на стопанскиот комори велат дека мерките се неопходни, особено поради регулирање на цената на струјата за стопанството. Според Ангеловски во моментов струјата на слободниот пазар е поевтина од таа на регулираниот, делумно и поради топлото време, но сепак доаѓаат зимски месеци и мерките се потребни.
– Апелираме државата во иднина да ја олесни можноста за инвестиции во обновливи извори, бидејќи вака зависиме само од берзанската струја што видовме дека може да донесе сериозни последици на економијата, додава Ангеловски.
Претходно од владејачкото мнозинство ја повикаа опозицијата да даде поддршка за блокираните мерки. Координаторот на пратеничката група на СДСМ, Јован Митрески вели дека не очекува опструкции од ВМРО-ДПМНЕ за помошта за бизнисите, особено за Законот за задолжување од Европската банка за обнова и раазвој со заем од 100 милиони евра за ЕСМ, за да се обезбеди производство на струја од домашните енергетски капацитети.
-Очекувам да биде закажана на Комисијата за финансирање и буџет и Законот за задолжување од ЕБОР со 100 милиони евра за ЕСМ за производство и снабдување на струја за граѓаните и фирмите. Исто така и законот, којшто е надвор од кризата, но е редовно работење и проблем за којшто долго време зборуваме и го бараат граѓаните, тоа е задолжувањето од 50 милиони евра за преработка на цврст отпад во регионални фабрики за преработка на отпад“, изјави неодамна Митрески за Цивилмедиа.
Тој уште информираше дека, иако пратениците од ВМРО-ДПМНЕ и од Левица веќе подолго време не учествуваат на состаноците за координација во Собранието, се вложуваат дополнителни напори и комуникација по други основи за да се поттикне учеството на народните избраници на опозицијата во расправата и донесувањето на законите од интерес на граѓаните и општеството.
Извор: Цивил Медиа
