Обезбедивме топли училници во речиси 500 училишта и силна поддршка за бизнисот
„Десет месеци ја предводам проевропската коалициска Влада и оваа голема партија, СДСМ. Работевме напорно, ден и ноќ и успеавме да реализираме најголеми антикризни мерки во регионот, вредни 760 милиони евра. Факт, потврден и од Светската банка. Обезбедувме топли училници во речиси 500 училишта и силна поддршка за бизнисот“ изјави премиерот и претседател на СДСМ, Димитар Ковачевски на граѓанската трибина во Кичево.
Тој додаде дека нема ништо поважно за него од тоа оваа зима да се помине заедно и никој да не остане назад.
„Уште во првите 100 дена од мандатот ја зголемивме минималната плата на 18.000 денари. За една година пензиите за сите 330.000 пензионери ги зголемиваме за 16%. Ја субвенционираме сметката за струја за сите домаќинства и за 72.000 компании, ранливи семејства и тоа во висина од 80% од реалната цена“ рече Ковачевски.
Премиерот потенцираше дека антикризните мерки вродија со плод, цените на храната почнаа да се намалуваат и тие ќе продолжат да се намалуваат.
„Имаме храна и енергија доволно во тешки услови за целиот свет. Нашиот енергетски и топлински капацитет е безбеден за оваа зима. Така е кога се има соодветен план, кога се работи напорно и кога знаењето се преточува во реални политики за земјата и граѓаните“ рече Ковачевски.
Ако Апасиев и Мицкоски дојдат на власт повторно ќе сме блокирани, гладни, изолирани и сиромашни
„ Ако пироманот Апасиев и неговиот заложник Мицковски дојдат на власт повторно ќе бидеме блокирани од ЕУ како во времето на Груевски, а економијата ќе ни крахира. Нивниот план е пеколен. Секој од вас ќе стане наутро со лажно чувство на гордост, но гладни, изолирани и сиромашни, заглавени во минатото“ рече премиерот и претседател на СДСМ, Димитар Ковачевски на граѓанската трибина во Кичево.
Тој додаде дека на дело се гледа обезличувањето на ВМРО-ДПМНЕ со признанието на Мицкоски како се гордее дека неговата партиај е континуитет на Ванчо Михајлов.
„Не му се проблем на Мицкоски контроверзните историски ликови кои биле на погрешната страна на историјата. Мицковски веќе не го бара она што е добро за државата, туку бара како да не заостане зад Апасиев“ рече Ковачевски.
Премиерот додаде дека нема да дозволи земјата што ја сакаме да тргне по тој пат, бидејќи на Северна Македонија не ѝ требаат опасни пиромани, туку нова економска визија.
„Веќе го трансформираме нашиот енергетски пазар и го користиме нашето сонце за да ја создадеме како иден зелен енергетски центар на Европа, кој исто така ќе ни обезбеди безбедна и евтина струја. Покрај кризата, секој месец се отвораат нови фабрики низ државата, правејќи ја Македонија меѓу трите најатрактивни економии во светот за странки инвестиции. Правиме работи кои за прв пат после 30 години се прават, во енергетиката, во инфраструктурата“ рече Ковачевски.
