„АНБ е нова ера во безбедносното разузнавање, по црната историја на УБК. Случајот со Онишченко е своевиден преседан кој се случи и ја одбележа 2022 година, но покажа дека системот функционира беспрекорно. Беа детектирани фалинките, започна истрага и постапка за да се утврди виновникот кој погрешил“ изјави пратеникот од СДСМ, Мартин Костовски во „Топ тема“ на Телма.
Тој додаде дека не сака од вакви безбедносни ситуации да се прави реално шоу за опозицијата да ќарува ситни политички поени.
„Новиот директор на АНБ дал соодветни информации пред пратениците за преземените активности и по завршувањето на истрагата ќе има лоцирана одговорност“ рече Костовски.
Пратеникот кажа дека најлошо е во едно демократско општество кога се се става на некаква колективна одговорност и се избегнува индивидуалната одговорност на тој кој згрешил во системот.
„Се надевам дека лоцираната одговорност ќе биде индивидуална, а не колективна“ рече Костовски.
Милошевски е професионалец и добро ќе ја води АНБ, за разлика од Мијалков кој имаше досие и беше партиски активист
„Заре Милошевски има признаено ЦВ, има дипломи, школуван е во САД. Станува збор за квалитетен кадар кој АНБ ќе ја води добро и во вистинска насока“ изјави пратеникот на СДСМ, Мартин Костовски во „Топ тема“ на Телма.
Тој додаде дека Милошевски е познат и докажан професионалец, за разлика од Сашо Мијалков, кој ја водеше поранешната УБК и кој, како што кажа Костовски, имаше криминално досие и беше посветен во партиските структури на ВМРО-ДПМНЕ.
„Од тука е мојата перцепција дека АНБ во наредниот период ќе работи квалитетно, професионално, независно и во интерес на граѓаните“ рече Костовски.
Пратеникот кажа дека не може да се стави равенство меѓу сите вработени во безбедносните структури, дека сите биле како Сашо Мијалков и кажа дека голем број луѓе преминале од УБК во АНБ и соодветно си ја вршат работата, но проблемот бил во лидерството.
