Манастирот Успение на Пресвета Богородица во село Матејче, еден од најрепрезентативните споменици на византиската уметност во нашата земја, кој е разурнат во воениот конфликт во 2001 година и подолго време е мета на вандализам и кражби, ќе биде заштитен како културно наследство во опасност, рече министерката за култура Бисера Костадиновска- Стојчевска на денешната прес конференција.
На новинарско прашање од НоваТВ одговори дека во буџетот се предвидени 1,5 милиони денари за заштита на манастирот како приоритет на културно наследство во опасност.
„Она што не е видливо во програмскиот буџет што го изнесовме денеска е тоа дека се предвидени 1, 5 милион денари за мерки за заштита на манастирот во Матејче. Ќе продолжиме и со реконструкција согласно насоките од надлежните институции. Во комуникација сме и со министерството за транспорт и врски кои ќе го санира патот до манастирот. Од општината Липоково ќе добиеме помош да се спречат натамошните кражби“, рече Костадиновска-Стојчевска.
Инаку од СВР Куманово низ годиниве повеќе пати информираа за кражба на оловото на покривот од манастирот.
Реагираше и кумановско-осоговската епархија, дека манастирот Успение на Пресвета Богородица во село Матејче, подолго време е цел на вандализам и кражби.
Низ годиниве имаше многу ветувања дека ќе се врати сјајот на овој манастир во состојба како што беше пред 2001 година, преку координирано ангажирање на Министерството за култура, Управата за заштита на културното наследство и Националниот конзерваторски центар.
Пред две години (2021) во рамки на годишната програма на годишната програма за финансирање на проекти од областа на заштитата на недвижното наследство за 2021 година, на надлежната установа НУ Национален конзерваторски центар, Министерството за култура одобри проект за заштитни интервенции на архитектурата и ѕидното сликарство на црквата во Матејче во износ од 1.000.000 денари. Во текот на 2020 година на барање на надлежната установа НУ Национален конзерваторски центар беа одобрени 300.000 денари за реализација на ургентни превентивни интервенции на црквата Успение на Пресвета Богородица во манастирот Матејче кои беа спроведени во првата половина на месец ноември и опфатија корективни мерки на оштетените и одвоени елементи од кровниот покривач од црквата и третман на споевите со ѕидните површини, како и затворање на оштетените стакла кај транзените на црквата.
Активисти од градот, со години алармираа за исклучително лошата состојба на манастирот која се влошуваше секоја година, по воениот конфликт 2001. Тие реагираа и дека средствата кои се одвојуваат од институциите, очигледно не се трошат за намената за која се предвидени а објектот е во се полоша состојба.
Манастирската црква е изградена во XIV век од страна на цар Душан, а по неговата смрт, неговата сопруга Елена и неговиот син Урош ја доградиле и живописале.
А.Василевска / НоваТВ
