На денешната седница на Советот на Град Скопје поставени се 2 точки, конкретно, точките односно предлог одлуките 9 и 10 – за определување на износ за субвенционирање на жители на градот Скопје, за купено ново еко возило на хибриден или електричен погон со која се предвидуваат 5.000.000,00 (петмилиони) денари вкупно, односно „Износот на субвенцијата за купено ново еко возило на хибриден или електричен погон се утврдува во износ од 200.000,00 (двестаилјади) денари со вклучен данок на личен доход“, по физичко лице, односно за само 25 лица (или 30 лица, ако се земе просек од 1,2 патника по возило) со по просек 2 патувања дневно за секое возило, ќе се дадат 5 милиони денари градски пари.
Одлуката 10 е за определување на износот за субвенционирање на правни лица регистрирани за вршење на авто-такси превоз на подрачјето на градот Скопје за купено ново еко возило на хибриден или електричен погон за вршење на авто-такси превоз со која се предвидуваат 5.000.000,00 (петмилиони) денари вкупно односно „Износот на субвенцијата за купено ново еко возило на хибриден или електричен погон за вршење на авто-такси превоз се утврдува во износ од 200.000,00 (двестаилјади) денари по возило, но не повеќе од 5 возила по правно лице купени во 2023 година“, односно ќе се помогне купувањето на 25 такси возила кои ќе прават десетици патувања на ден секое.
Од организацијата „На Точак“ соопштија дека се против вакви одлуки воопшто кои служат само за ПР, купување време, greenwashing и одржување на автомобилското статус кво.
„Се плашиме дека ако оваа одлука помине (и Одлука 10, но посебно Одлука 9)
* многу општини ќе го следат примерот и ќе почнат да даваат вакви проблематични субвенции;
* големи субвенции (од по 3 илјади евра на физичко лице! Зарем во друга област од живеењето Град Скопје помогнал физичко лице со 3 илјади евра?!);
* на мал број поимотни луѓе (имајќи предвид дека електричните и хибридните возила се поскапи, нив ги купуваат луѓе на кои не им ни требаат субвенциите, односно разликата во цена им е занемарлива).
Исто така оваа одлука би била со:
* немерливо мал ефект во намалување на загадувањето во градот (тие луѓе веќе имаат поквалитетни возила, а се менуваат нивните возила, или уште полошо, се поттикнуваат да поседуваат +1 возило, наместо да им се помогне на оние граѓани со најлоша категорија возила кои најмногу загадуваат);
* лош ефект на климатските промени (зашто ќе предизвика непотребно обновување/зголемување на возен парк односно севкупно поголем еколошки отпечаток за производство на ново возило, отколку добиениот бенефит споредено со претходното возило со исто така висока еколошка категорија),
* и продолжување на метежот и заглавеноста на автоцентричниот град, кои не можат да се решат со понови коли, туку со помалку коли.
Кога би ги споредиле двете одлуки, предлог одлука 10 има барем некаква логика, бидејќи такси превозот е некаков тип јавен превоз со кој се прават голем број патувања (особено ако возилата се користат во повеќе смени) и ако Град Скопје сака да промовира е-автомобили, но и да има реален ефект на загадувањето, сите пари треба да се префрлат тука, односно од точка 9 во точка 10. Исто така, одлуката треба да се допрецизира, да се доработи за да има реален ефект.
Град Скопје како институција која издава лиценци на такси возила, сигурно има регистар на еколошката категоризација на такси возилата. Во таа смисла предлагачот треба да изготви анализа на реалниот ефект од вакво субвенционирање (заштедените тони ПМ честички, заштедените стакленички гасови, заедно со севкупниот еколошки отпечаток).
И секако, со повикот за субвенции Град Скопје треба да ги услови такси-компаниите да ги заменат своите најлоши возила за да ја добијат субвенцијата.
Ако ваква анализа не се направи, подобро е одлуките целосно да се повлечат или гласаат против“, се вели во реакцијата на „На Точак“.
