Главен фокус во работата на новиот директор на Царинската управа, Стефан Богоев ќе биде усогласување со европските процедури и борбата против корупцијата и шверцот. Така, како што рече Богоев во гостувањето на ТВ24, ќе се помогне и на бизнисот и на граѓаните и на државата.
-Високи професионалци од Царината работеле и досега на темата за олеснување на процедурите, а главен фокус ми е сорабтка со соседите од Отворен Балкан, како и за подготвеноста за поглавјето 29 со Европската Унија, бидејќи треба да се усогласиме со нивните процедури, кои ќе овоможат слободен проток на стоките. Со Отворен Балкан и со усогласувањето очекувам придонен да има за бизнисот, преку намалување на директните трошоци, но и индиректните, како што е намалување на времето за чекање, кажа Богоев.
Тој порача дека бизнис заедницата ќе има партнер во Царината и нејзините службеници.
-Она за што ќе се залагам е и сериозна борба против шверцот и корупцијата во Царината. Така државата губи пари, а вториот аспект е што неколкумина вработени во Царината кои се можеби корумпирани, фрлаат дамка на сите оние професионалци кои работат во Царинската управа. Со сузбивањето на корупцијата и шверцот верувам дека тоа ќе го направиме. Исто така потребна е и јавната кампања и транспарентноста во работењето, пред се заради довербата кај граѓаните, истакна Богоев.
