Косовскиот министер за внатрешни работи Џелал Свечла, соопшти дека тројца припадници на косовската полиција биле киднапирани од Србија на територијата на Косово.
„Додека кај нас се спроведува редот и законот, криминалната Србија влезе на територијата на Косово и киднапираше 3 полицајци на Република Косово, кршејќи каков било договор и спротивно на секое начело на меѓународните норми. Без сомнение, нашите полицајци се лоцирани длабоко на територијата на Република Косово, на статичен контролен пункт и ги извршуваат своите редовни задачи“, напиша Свечла на Фејсбук.
Свечла побара од меѓународниот фактор да го зголеми притисокот врз Србија, за да ги ослободи приведените и да престане со провокациите.
„Србија продолжува да биде причина и чувар на злото во регионот и во Косово. Не отстапуваме пред криминалците и терористите. Србија повторно го покажува своето вистинско лице и тоа на автократска и агресивна држава. Бараме од меѓународниот фактор итно да го зголеми притисокот врз Србија не само да ги ослободи нашите полицајци туку и да престане со нејзините провокации. Ваквото криминално однесување на Србија не не спречува во нашиот пат за зајакнување на суверенитетот во земјата“, посочи Свечла.
Тројца косовски полицајци се киднапирани денеска напладне од страна на српските сили на територијата на Косово, на едно од патиштата на северот на земјата, кој според полицијата бил користен како нелегален пат од криминални групи. за илегално преминување и криумчарење од Србија.
Како што соопшти косовската полиција, нивното киднапирање се случило во статична точка на местото Тресаве/Баре.
Д. Т.
