Поранешниот градоначалник на скопската општина Центар, Владимир Тодоровиќ синоќа бил уапсен, пренесоа неколку медиуми.
На граничниот премин Табановце утрово бил приведен и поранешниот претседател на Советот на Општина Центар, Владимир Здравев.
Според медиумите, овие приведувања се поврзани поради сомневања за перење пари при набавка на опрема за мостот Око, дел од Скопје 2014.
Според ЈО осомничените, во периодот од 2009 до 2012 година, при спроведување постапка за јавни набавки, со неизвршување на својата службена должност овозможиле изведувачот на проектот за изградба на пешачкиот мост „Око“ на реката Вардар да стекне имотна корист во износ од 26.653.424 денари.
По склучување на договорот во висина од 92.546.647 денари за јавна набавка на работи, Општина Центар како инвеститор, од една страна, и изведувачот на градежните работи, од друга, склучен е и анекс на договорот за јавна набавка, со што вредноста на договорот се зголемила на износ од 119.197.783 денари.
„Првоосомичениот како извршен орган на Општината и потписник на договорот за јавни набавки и анекс-договорот за јавна набавка, второосомничениот како потписник на барањата за исплата, кој имал обврска да ја проверува документацијата и со тоа да го следи степенот на реализација на проектот, и третоосомничениот како овластено одговорно лице за следење на текот на изведбата на проектот во согласност со договорот, не ги запазиле законските одредби од Законот за јавните набавки. Осомничените во согласност со своите надлежности не презеле активности за активирање и наплата на банкарските гаранции депонирани во деловните банки од страна на изведувачот, ниту побарале продолжување на рокот на важност на гаранциите во износ од 8.773.714 денари за дадените аванси“, се наведува во соопштението на Јавното обвинителство на Република Македонија од 2018 година.
Оттаму тогаш објавија дека првоосомничениот во согласност со склучениот анекс-договор, иако бил обврзан, не го продолжил рокот на важност на банкарската гаранција за навремено и квалитетно извршување на работите во износ од 17.879.710 денари, која, по раскинувањето на договорот, требало да ја активира и наплати во корист на Општина Центар.
МВР засега не се огласува за случајот.
