Финската влада претстави план за реформа на образовниот систем во основните училишта, кој треба да се спроведе во следните четири години.
Во владината програма стои дека секој млад човек кој ќе заврши основно образование мора да има доволно основни знаења и вештини за средно образование, но наставниците се жалат дека немаат доволно време да ги предаваат на учениците овие основи. Затоа ќе се вложат повеќе пари во основното образование, пишува весникот „Хелсингин саномат“.
Финската влада во 2024 година ќе одвои 50 милиони евра за основно образование, а тој буџет до 2027 година треба да се зголеми на 200 милиони евра.
Истовремено, минималниот број на часови ќе се зголемува за два до три часа на неделно ниво, но без проширување на наставната програма. Целта е да се зголеми бројот на часови за учење читање, пишување и аритметика. Дополнително, ќе се дефинира минималното ниво на знаење кое е потребно за преминување од еден во друг клас.
Финската влада сака да воспостави и единствен модел за спречување на насилството во училиштата.
Според новиот модел, се предвидува поднесување кривична пријава доколку дете помладо од 15 години стори незаконско дело на училиште. Потоа ќе се организира дискусија во која ќе учествуваат сторителот и жртвата, како и нивните старатели, полицијата и правните застапници. Се наведува и дека ќе се зајакне правната заштита на ученикот кој бил жртва на насилство.
Во финските училишта, моментално е можно да се ограничи употребата на телефони доколку уредот се смета за „нарушувачки“ фактор. Сепак, владата сака на наставниците да им се дадат повеќе овластувања кога станува збор за забрана за користење телефони за време на часовите.
Образовниот систем на Финска се смета за еден од најдобрите во светот, а студентите во земјата често се рангирани на прво место во образовната студија ПИСА.
