Пишува: НЕНАД ЈОВАНОВИЌ
Убав наслов, му приличи на денешниот контекст, ќе мора да признаеме. Имено, денеска започнува дебатата во Собранието на Република Северна Македонија, ќе се расправа за 3.000 и нешто Бугари. Поточно, ќе се расправа за тоа дали некои луѓе треба да влезат во Уставот и продолжат непречено, официјално и законски да живеат во оваа држава. Притоа, се работи за малцинство, а не за мнозинство.
Ништо драматично, ништо помпезно. Сосема нормална работа за цивилизирани земји кои планираат да го фатат Европскиот воз. Кој ја блокира оваа работа? ВМРО-ДПМНЕ и нивната (гео)политика наречена „Трето око“. Тие сердари спекулираат, тие мислат, тие предвидуваат, тие (читај, вмроовците!) фрлаат тешки зборови, тие прекројуваат и закројуваат. Тука, најблаго речено, водат главен збор сите (гео)политичари склони на Руска политика. А зошто е тоа така? Затоа што, дами и господа, во Кремљ седат луѓе кои се неприемчиви за лупетањата на псевдојуродиви типови кои се колнат во Христа. За руските главешини, пак, некои мислат вака, некои мислат така, ама во едно сите се сложни: тоа се многу сериозни и ако затреба – опасни луѓе. На солзите (и кукањето!) традиционално не им веруваат.
Воспалени или вжештени глави толерираат до извесни граници. Кога главите ќе претераат, кремељските „бољари“ заради ладење ги потопуваат во Северниот леден океан. И од тамо повеќе не ги вадат. Така се работи во Третиот Рим.
А во Четвртиот Рим, поточно во Скопје, работата стои потполно обратно. За да се успее да се влезе во врхушката на ВМРО-ДПМНЕ, прв и основен услов е да се има вжештена глава. Нашите „вмроовски“ вжештени глави – сите загледани во Кремљ – ама од Кремљ ништо не учат. А би требало – веќе кога се глупираат дека во нив лежи клучот на „традицијата“ и „идентитетот“!
Сетете се само на епизодата на Јосиф Висарионович – папата нешто се куробрецал – па го прашал надлежниот министер: а колку папата има тенковски дивизии? Кога го слушнал одговорот, веднаш светиот татко го ставил ad acta. Поучна приказна! Ама овие наши конзервативци, да ги наречеме „руски бољари“, никако да ја разберат поентата, а поентата е следна: кој во овој грешен и на глава паднат свет нема силни тенковски дивизии, атомски глави, атомски подморници и атомски носачи на авиони, таквите за ништо на светот не треба многу да се „куробрецаат“.
Трезвените меѓу „вмроовците“ (а таквите се реткост!), сепак го сфаќаат тажното куробрецање на нивните партијаши, ама вжештените глави и кај нив преовладуваат. Наместо да го согледаат нашето место во светот и соодветно на тоа да се организираат, тие потклекнуваат на стратегијата наречена „македоностратегија“: ќе им се приближиме на Русија и Кина, така мозгаат нашите вжештени глави, па дел од нивната вооружена аргументација ќе дојде во нашиот атар.
Тоа само покажува дека нашите конзервативни (мео)стратези немаат променето сијалица или осигурач во своите домови, а камо ли да разберат како работи овој до злабога паднат свет.
Но, ајде да видиме. Сепак мојата надеж останува дека има и во таа партија „луѓе од формат“. Ајде, другари и другарки, измиете се со ладна вода, стиснете муда од Лабуда, изгласајте ги Уставните измени „машки“. Во спротивно, тој што ќе го опструира вековниот сон на македонците, се знае, надлежните органи треба да си поводат сметка. Нема тука многу што да се филозофира, ниту пак Собранието на Републиката е филозофски клуб, ако ме разбирате што сакам да ви кажам.
