Пишува: ГОРАН ВОЛКАНОСКИ
Пиејќи го утринското кафе, слушам емисија во која се зборува за 11-ти Октомври. За значењето на овој историски датум. За мотивацијата која била повод еден грст луѓе да поведат антифашистичка борба која ни ја донесе денешната слобода и државност. Притоа се спомнаа некои од темелите на кои се засноваше создавањето на идната држава. Меѓу другото, беа спомнати и соживот и почитување на правата на сите заедници кои беа и сѐ уште се дел од заедничката држава која требаше да се гради. И, се изгради, преку крвавата антифашистичка борба во која зедоа учество претставници од сите заедници. Сите нив ги спојуваше антифашизмот, слободарската мисла и непокорот!
Што имаме денес? Колку сме достојни да ги славиме ваквите историски моменти?
Знаете зошто го поставувам ова прашање? Не можам да се изначудам, како може нешто што е толку очигледно, да не биде подржано од сите сегменти на нашево општество? Нешто што е континуитет на 11-ти Октомври 1941-ва!
Тоа е таа нишка која нас, антифашистите, слободоумните, нѐ инспирира да во ова време, кога темни облаци се надвиснуваат над Македонија не останеме неми пред злото кое ни нуди уништување на перспективите за интегрирање во најмоќниот економски сојуз. Самиот процес на преговори со ЕУ е перспектива сама по себе. Пристап кон ЕУ фондови. Реализација на стандарди, преку отворање и затворање на поглавјата од преговарачкиот процес. Сѐ е тоа реализација на она кон што се стремиме. Создавање на функционална држава со стандарди на кои ќе сме горди!
Но! Што е она, што нѐ спречува да ги оствариме овие стремежи?
вмро-дпмне! Ова е таа (единствена во Европа) анахрона „внатрешна“, „македонска“, „револуционерна“, „организација“ во независна држава, која што го користи ова име само за една единствена цел, манипулација со националните чувства.
Политичка организација која ниту во 1941-ва беше на вистинската страна на историјата, ниту денес е на исправната страна на историските процеси. И тогаш и сега, го прави истото. Одработува за туѓи цели и интереси!
Прашање е само, дали мнозинството од граѓаните ќе наседнат на ова подметнување од страна на опозицијата, и ќе одработат во сопствена штета.
Континуитетот на револуцијата и НОБ од 1941-ва, може да ја имаат само прогресивните сили!
На сите оние, на кои, 11-ти Октомври им е значаен ден. На сите оние кои го слават овој ден. Им упатувам една искрена порака. Сочувајте го делото на револуционерната борба од 1941-ва, со поддршка на процесите кои се континуитет на таа борба. Така ќе покажеме дека заслужуваме да ги празнуваме овие историски датуми!
