Вчерашниот директен пренос на емисијата „Само вистина“ беше неславно прекинат, со вклучувањето на директорот на телевизијата, Иван Мирчевски, кој го избрка Исмет Рамадани, советник во Владата и претседател на Евроатлантскиот сојуз. Емисијата ја водеше новинарот Александар Видиновски. Водителот како домаќин, се најде „навреден“ од Рамадани за изнесениот став дека во емисијата и во телевизијата се промовира национализам, зборувајќи во контекст на етничка дискриминација.
Жестоки реакции со осуда пристигнаа од новинарската и експертската фела и граѓанските организации, поблага од ЗНМ, ССНМ СЕММ, а реагираше кратко и млако ААВМУ. Остра осуда упати и ЦИВИЛ, со соопштение до медиумите и јавноста, а во отвореното студио на ЦИВИЛ МЕДИА гостуваа поголем број истакнати интелектуалци, експерти и новинарски имиња. Редакцијата при медиумската платформа на организацијата доби повеќе од десет изјави што ги објави во текот на денот.
Но грубиот акт на ТВ Канал 5 беше искористен и за жестока одбрана од поединци, па и политички партии и организации кои се обидоа да го оправдаат непрофесионалното и неетичко однесување на Мирчевски, како директор на телевизијата, а во контекст на „недоличното“ однесување на Рамадани како гостин. Меѓу нив се најдоа и опозиционерите, кои се најдоа повикани да го осудат Рамадани, во корист на Мирчевски.
Македонската асоцијација на новинари (МАН) целосно застана во одбрана на Мирчевски и Канал 5.
ВМРО-ДПМНЕ, пак, побара од Владата да се огради и извини од изјавите на Рамадани. Во познат манир, оваа партија изјави дека „власта има селективен однос кон медиумите, делејќи етикети, премиерот и неговите луѓе да се конфронтираат со новинари и притоа да се не оградат од ваквите постапки“.
Иван Стоилковиќ, претседател на Демократската партија на Србите во Македонија, ја оправда реакцијата на Мирчевски, а за Рамадани рече дека не е „умерен“ Албанец и дека нема право да збори за етничка дискриминација на Албанците, кога Македонците се дискриминирани во сопствената држава, како и Србите и другите помали заедници.
Партијата Интегра отиде дотаму што дури и ја охрабри Канал 5 да поднесе пријава до надлежните органи, оценувајќи го обраќањето на Рамадани како „непримерен обид за напад на новинари и медиуми“.
Максим Димитриевски, градоначалникот на Куманово, побара оставка од Рамадани од позицијата претседател на Евроатланскиот совет на Македонија, обвинувајќи го за „импутирање на шовинистички наратив“.
Мирјана Најчевска, пак, напиша дека Рамадани треба да одговара за поттикнување на етичка и национална нетрпеливост, затоа што со тоа се обидел да го затскрие криминалот со повикување на „наводна етничка дискриминација“.
Сашо Тасевски, „со сета почит“ кон Рамадани, му извади долг список зошто Македонците немаат доверба во Албанците, укажувајќи и колку е чист ко солза, етичен и морален водителот.
Мирчевски, од друга страна, „разочаран“ од реакцијата на ЗНМ, директно му се обрати на претседателот Младен Чадиковски, дискредитирајќи го како колега, новинар, па дури и медиумот во кој работи: Како не ти е срам да бидеш лидер на ЗНМ и да водиш вести на една малечка незначајна телевизија во исто време?
Истовремено, му објаснува на Чадиковски како Рамадани им се заканил на „сите нас Македонци“.
И шефот на Демократски сојуз, Павле Трајанов, упати осуда за Исмет Рамадани, велејќи дека „ги загрозува новинарите и слободата на говорот“.
Оваа јавна дебата или „хајка“ против Рамадани, всушност на националистите им даде одврзани раце со национализам да се конфронтираат против „национализмот“ на Рамадани, а преку него и со Албанците.
Ваквата одбрана на Мирчевски, всушност, претставува атак на слободата на медиумите и слобода на говорот.
Целиот скандал во вчерашната емисија на Канал 5, отвори поголем број прашања. Од една страна се дебатира кој е во право, а кој не, но од друга страна, се отвори поважно прашање, а тоа е – како да се ослободат медиумите, односно како да се обели образот на новинарството и да се ослободи од националистичките наративи.
