Нема нови информации, полицијата сè уште трага по 14-годишното девојче Вања Ѓорчевска, на кое вчера му се изгуби трагата, откако во 7 часот утрото заминало во училиште, во Општина Центар. За исчезнувањето на девојчето на социјалните мрежи информираше неговата мајка Зорица, која побара помош од граѓаните да се најде нејзината ќерка.
„Девојчето е облечено во црни панталони со странични џебови, светло плав џемпер, црна кратка зимска јакна и бели најк патики со кафеава лента на ѓонот. Последниот пат е видена во Дебар Мало на пат кон Песталоци. Доколку имате било каква информација јавете се на 075-400-816“, стои во објавата на мајката.
Доцна вечерта во додаток на објавата мајката апелираше да запрат дезинформациите и се заблагодари на МВР за ангажманот за наоѓање на девојчето.
„Би сакала многу да се заблагодарам до министерството за внатрешни работи кое несебично е на терен и доцна вечерва за да го пронајде моето малолетно дете. Ве молам не ширете дезинформации, не помагаат во пронаоѓањето.“, напиша мајката на Фејсбук.
Во изјава за „Слободен печат“, мајката вели дека ја нема Вања на снимките од камерите.
Цела ноќ бевме во полициска станица Беко и сите полициски единици се максимално ангажирани и затоа ми е криво што ја критикуваат полицијата. Верувајте дека се прават но ќерка ми ја нема… Сите опции се разгледуваат од страна на полицијата, нема насока во која не се размислува и во која не се истражува. Се претресуваше собата, сите пораки се прегледаа, компјутерот им го дадов, ништо не најдовме. Роднини се вклучија, родителите на соучениците, камерите се разгледаа, но тие немаат поширок спектар и гледаат само блиску до бизнисите. Никаде ја нема, на ниедна снимка, изјави мајката.
„Министерството за внатешни работи ја известува јавноста дека се преземаат интензивни мерки и активности за пронаоѓање на В.Ѓ. (14) откако денеска (27.11.2023) во 08.35 часот З.Ѓ. од Скопје пријави дека се сомнева дека нејзината ќерка В.Ѓ. (14) е исчезната. За решавање на случајот и пронаоѓање на лицето веднаш по добиената пријава вклучени се целосните капацитети на СВР Скопје на највисоко ниво, извршени се низа разговори со лица блиски на малолетничката, прегледани камери итн. Апелираме да не се шират дезинформации, а МВР постојано ќе ја информира јавноста се до пронаоѓање на малолетничката.“, соопштија синоќа од МВР.
