Драги читателки и читатели,
На политички план, изминатите седум дена беа исклучително турбулентни. Земјата доби датум за избори – 24 април 2024 година ќе се одржи првиот круг на претседателските избори, а на 8 мај ќе се одржат двојни избори, втор круг од претседателските и парламентарните избори.
Во меѓувреме, при посетата на нашата земја, помошник-државниот секретар на САД за Европа и Евроазија, Џејмс О’Брајан, во интервју за „360 степени“, во само неколку зборови, го разобличи манипулативниот наратив на опозицијата.
„Ако велат – имам подобра понуда, но нема сега да ви кажам што е – тоа е личност од која не би купиле автомобил. Па, мислам и дека не би требало ни да гласате за нив“, рече О’Брајан.
Во Скопје се одржа светски политички настан, 30-от министерски состанок на ОБСЕ. Лавров беше прописно маргинализиран од најголемиот дел од учесниците, ЦИВИЛ го прогласи за непожелен, а тој се однесуваше скандалозно. Одржа долг говор преполн со лаги и пропаганда, избега од дискусијата, а потоа свика прес конференција додека траеше завршната сесија на самитот.
*
Нема човек кој не беше длабоко погоден од грозоморното убиство на малечката Вања. Наставници, родители и деца, со солзи во очите, се запишаа во книгата на жалоста посветена на Вања, што се отвори во ОУ „Песталоци“ во Скопје. Македонската јавност беше длабоко трауматизирана од деталите поврзани со киднапирањето и убиствата.
По брзата реакција на МВР, откриени се сторителите на грозоморните злосторства, крволочна банда собрана околу партијата Десница, во кои животот го загубија 14-годишната Вања и 74-годишниот велешанец Панче. Брзината и транспарентноста на МВР и ОЈО влијаеја да се намалат штетните последици од дезинформациите и пропагандните наративи и теории на заговор кои се лансираа веднаш по откритието на злосторствата.
Фронтлајн останува на Првата линија на борбата против дезинформациите и малигните влијанија од странство.
Ви благодариме на довербата и поддршката.
Срдечно ваши,
Редакција Фронтлајн
