Израел на 11 и 12 јануари ќе одговори на обвиненијата за геноцид пред меѓународен суд за прв пат од почетокот на инвазијата на Појасот Газа, откако Јужноафриканската Република започна процес пред Меѓународниот суд на правдата (МСП) на Обединетите нации.
Судот во Хаг го објави распоредот на рочиштата вчеравечер. Јужноафриканската Република (ЈАР) ќе го изнесе своето обвинение на 11-ти, а Израел ќе се брани на 12-ти. Двете страни ќе добијат по два часа.
ЈАР, повикувајќи се на Конвенцијата за спречување и казнување на злосторството геноцид, во петокот поднесе документ во кој на осумдесет страници објаснува зошто верува дека Израел врши геноцид во палестинската енклава. Двете земји се потписнички на Конвенцијата.
ЈАР бара судот веднаш да дејствува и да нареди прекин на насилството врз Палестинците. Оваа африканска земја смета дека израелските напади се од геноциден карактер, бидејќи нивната цел е уништување на Палестинците во областа.
Документот вклучува обвинувања за злосторства извршени од израелската армија врз Палестинците, како и изјави на израелското раководство кои наводно укажуваат на намера за геноцид.
Лиор Хајат, портпарол на израелското Министерство за надворешни работи, ги отфрла обвинувањата.
Israel rejects with disgust the blood libel spread by South Africa in its application to the International Court of Justice (ICJ).
South Africa’s claim lacks both a factual and a legal basis, and constitutes a despicable and contemptuous exploitation of the Court.
South Africa… pic.twitter.com/dqyhY8WYE0
— Lior Haiat 🇮🇱 (@LiorHaiat) December 29, 2023
-Израел со гадење ја отфрла крвната клевета што Јужноафриканската Република ја шири со оваа жалба до МСП, напиша тој минатата недела на „Х“.
Тужбата нема фактички и правни основи, напиша тој, додавајќи дека овој суд и меѓународната заедница треба целосно да ги отфрлат неоснованите тврдења на ЈАР.
Хајат тврди дека само Хамас е одговорен за страдањата во Газа и дека Израел прави се што може за да ги минимизира страдањата на цивилното население.
