Австралискиот глумец Џејкоб Елорди, кој го привлече вниманието со улогата во „Еуфорија“, успева да остави впечаток како едно од идните најбарани имиња во Холивуд.
Така, најновата вест говори дека Елорди ќе глуми во новата верзија на „Франкенштајн“, под режисерската палка на Гиљермо дел Торо. И тоа, младиот Австралиец ќе го глуми чудовиштето. Тимот глумци го надополнуваат Оскар Ајзак (како д-р Франкенштајн), Мија Гот, Кристоф Валц, Феликс Камерер, Ларс Микелсен, Дејвид Бредли, Кристијан Конвери итн.
Елорди лани беше актуелен со за него доста успешните филмови „Присила“ и „Солтбурн“ (Saltburn).
Со ова, Дел Торо ја продолжува долгогодишната соработка со „Нетфликс“, благодарение на која доби Оскар и со „Пинокио“.
Режисерот, добитник на Оскар и за „Обликот на водата“, се занимава со пишување на сценариото, режија и продукција на „Франкенштајн“, засновани на романот на Мери Шели за брилијантниот, но егоистичен научник Виктор Франкенштајн кој во 19. век оживува мртовец во морално-етички контроверзен експеримент.
Според критичарите, Елорди (26) покажа дека знае да глуми, па многумина му предвидуваат светла иднина во Холивуд.
