Деканката на Факултетот за странски јазици при Универзитетот во Тирана, проф. д-р Есмералда Кромида гостувајќи на албанската телевизија А2, зборуваше за воннаставните модули на македонски јазик на факултетот.
-Ги инаугуриравме воннаставните курсеви по македонски јазик и литература, со што им даваме можност на студентите, покрај двата или трите странски јазици што ги изучуваат во нивните наставни програми, да изучуваат и други јазици кои им се важни и кои се потребни, според нивната студиска програма. Започнуваме курсеви по македонски за студенти кои сакаат да учат македонски јазик, давајќи им значење и на јазиците од регионот, рече таа.
Кромида објасни дека студентите можат да го изучуваат македонскиот како трет или четврт јазик, додавајќи дека „изучување на еден странски јазик денес е придобивка да се гледа светот многу поблиску“.
-Затоа, многу е важно студентот што повеќе да се отвори кон другите јазици и култури. Со тоа ќе има друга визија за светот, друг професионален развој, и граѓански развој. Учењето англиски и други повеќе зборувани, но и помалку зборувани јазици за него е дополнителна вредност во неговиот иден избор во професијата, во студиите, на семинари, средби, на патувањата што ги прави за да го запознае светот, оценува Кромида.
Додаде дека на Факултетот се изучуваат неколку јазици, така што покрај главните јазици за кои сме навикнати да зборуваме и се структурирани по катедрите, како англиски, германски, француски, италијански, шпански, грчки, балканските словенски јазици, турски, руски, во наставните програми нудат и македонски, полски и хрватски јазик.
Според неа, албанската држава како земја која сака биде интегрирана во Европската Унија има одредени обврски во еднаквоста на јазичните политики за почитување на повеќејазичноста, почитување на „наставата на главните странски јазици што се зборуваат, но денес зборуваме и за почитување и на повеќејазичноста и за учење на помалку зборуваните странски јазици, односно јазиците на малцинствата“.
Вчера во Универзитетот во Тирана свечено беше означено отворањето на воннаставните модули за македонски јазик, литература и култура.
Од Амбасадата на Република Северна Македонија, за МИА изјавија дека македонскиот јазик ќе почне да се изучува од 5 февруари и оти до сега се пријавени 20 студенти. Бројот се очекува да биде поголем, бидејќи пријавувањето се уште трае.
