„Ги следам рејтинзите, како што ги следат и сите кои се засегнати од изборниот резултат. Но, главниот рејтинг и бројка ќе ги имаме на денот на изборите“ рече заменик-претседателката на СДСМ, Сања Лукаревска за ТВ Стар.
Таа додаде дека и минатиот пат, во 2020 година, ВМРО-ДПМНЕ зборуавшше дека според анкетите е многу понапред од СДСМ, но реалноста се покажа поинаква и СДСМ освои повеќе мандати и направи влада.
„Денот на изборите ќе биде и главната анкета. Ова што го гледаме сега, не го земаме здраво за готово. Ќе покажеме дека тие анкети не се точни“ рече Лукаревска.
Зборувајќи за уставните измени, Лукаревска вели дека секоја партија треба да го каже ставот – ќе ги правиме уставните измени или ќе се враќаме назад?
„Од ВМРО-ДПМНЕ слушнавме дека овој парламентарен состав нема да ја има таа можност да ги донесе уставните измени, но еве сега ќе одиме со нов пратенички состав и тука мора отворено секоја политичка партија да го каже своето мислење, својот став и својот план – што правиме со уставните измени, дали ќе се вратиме назад?“ запраша Лукаревска.
Таа додаде дека СДСМ во својата програма има посебен дел, токму за европската перспектива и продолжување на истата и дека тие се апсолутно против поништување на договорите со Грција и Бугарија.
„Преспанскиот договор е нешто кое што ни овозможи да ни се отворат вратите кон целата меѓународна заедница. Она што значи уставни измени ние бевме поворници, ја водевме целата таа приказна. Станува збор за почитување на европските вредности и тоа е тоа што ни остана како домашна задача“ рече Лукаревска.
