Министерот за надворешни работи на Израел, Израел Кац денеска ги повика амбасадорите на земјата во Ирска и Норвешка на итни консултации, бидејќи Норвешка ја призна Палестина, додека Ирска се очекува денеска да го објави признавањето на палестинската независност.
„Испраќам многу јасна порака до Ирска и Норвешка: Израел нема да дозволи ова да помине во тишина“, рече Кац, пренесува Тајмс оф Израел.
Тој додаде дека истото ќе го направи и со Шпанија, доколку Мадрид ја признае Палестина.
„Ирска и Норвешка имаат намера да испратат порака до Палестинците и светот – теророт се плаќа“, рече Кац, додавајќи дека на тој начин „ги наградуваат Хамас и Иран“.
Кац проценува дека “ова е чуден потег пред жртвите на 7 октомври“, кога палестинскиот Хамас уби околу 1.200 луѓе на југот на Израел и киднапираше повеќе од 240.
„Тоа, исто така, ги отежнува нашите напори да ги вратиме дома 128-те заложници. Мирот сега е помалку сигурен и го поткопува правото на Израел на самоодбрана. Нема да бидеме одвратени од оваа ирско-норвешка парада на глупости. Ние сме решени да ги исполниме нашите цели: да ја вратиме безбедноста на граѓаните, да го собориме Хамас и да ги вратиме заложниците“, рече Кац.
