Пожарот кој брзо се шири, поттикнат од силните суви ветрови на Санта Ана, принуди илјадници луѓе да ги напуштат своите домови во Јужна Калифорнија.
Противпожарната служба во округот Вентура, северозападно од Лос Анџелес, го окарактеризира пожарот како „многу опасен“. Жителите треба да ги почитуваат наредбите за евакуација, рече шерифот Џим Фрајхоф на прес-конференција.
За неколку часа, таканаречениот „Планински пожар“ во близина на градот Камарило се прошири на површина од повеќе од 40 квадратни километри.
Властите предупредија на силни ветрови од Санта Ана, кои главно се случуваат во Јужна Калифорнија во текот на есента и зимата. Сувите ветрови, велат тие, ќе го засилат екстремниот ризик од пожари. Дополнително, постојаните температури слични на летото и сувата вегетација, која лесно се пали, се фактори кои придонесуваат.
Гувернерот на Калифорнија Гевин Њусом побара итна помош од Федералната агенција за управување со вонредни состојби за да се бори со пожарот. Над 3.500 домови и деловни објекти се загрозени во погодениот регион, се вели во соопштението.
Се уште не се знае обемот на штетата. Двајца жители се пренесени во болници поради можно вдишување чад. Густ чад го покри регионот, со слики на јагленисани автомобили и запалени куќи.
Сезоната на пожари во Калифорнија завршува на крајот на годината, нагласи противпожарната управа на државата на X.
