Поранешниот претседател на САД Барак Обама остро реагираше по убиството на американскиот државјанин Алекс Прети, од агентите на ICE, оценувајќи го настанот како „срцекршечка трагедија“, но и како сериозно предупредување за состојбата со владеењето на правото и основните вредности во САД.
„Убиството на Алекс Прети е срцекршечка трагедија. Но, тоа треба да биде и повик за будење за секој Американец, без разлика на политичката припадност, дека многу од нашите основни вредности како нација се сè повеќе под напад“, напиша на Фејсбук Обама.
Тој нагласува дека федералните служби за спроведување на законот и имиграциските агенти имаат сложена и тешка задача, но дека од нив се очекува да постапуваат законски и одговорно.
„Американците очекуваат тие да ги извршуваат своите должности на законит и одговорен начин и да соработуваат, а не да се спротивставуваат на државните и локалните власти за да се обезбеди јавната безбедност“, наведува Обама.
„Тоа не е она што го гледаме во Минесота“
Обама посочува дека во Минесота се случува токму спротивното од она што го налагаат законот и демократските стандарди.
„Со недели, луѓето низ целата земја со право се згрозени од спектаклот на маскирани припадници на ICE и други федерални агенти кои дејствуваат без одговорност и користат тактики што изгледаат како намерно осмислени да заплашуваат, вознемируваат, провоцираат и да ги доведат во опасност жителите на еден голем американски град“, наведува поранешниот претседател.
Тој потсетува дека дури и поранешниот главен правен советник на Министерството за внатрешна безбедност во првата администрација на Доналд Трамп ваквите постапки ги опишал како „срамни, беззаконски и сурови“.
Критика до администрацијата и ескалацијата
Обама оценува дека овие, како што ги нарекува, преседански тактики резултирале со смртта на двајца американски државјани – Алекс Прети и Рене Гуд – и ја критикува актуелната администрација поради начинот на кој реагира.
„Наместо да се обидат да воведат дисциплина и одговорност кај агентите што ги распоредија, претседателот и актуелните владини претставници изгледаат подготвени да ја ескалираат ситуацијата, нудејќи јавни објаснувања за убиствата кои не се засноваат на сериозна истрага и кои, според видео-доказите, директно им противречат“, наведува Обама.
„Ова мора да престане“
Во пораката, Обама повикува на итна промена на пристапот.
„Ова мора да престане. Се надевам дека по оваа последна трагедија, претставниците на администрацијата ќе го преиспитаат својот пристап и ќе почнат конструктивно да соработуваат со гувернерот Волц, градоначалникот Фреј и со државната и локалната полиција, за да се спречи понатамошен хаос и да се постигнат легитимни цели во спроведувањето на законот“, пишува тој.
Поддршка за мирните протести
Обама упати и јасна поддршка до мирните протести што се одржуваат во Минеаполис и во други делови од САД.
„Секој Американец треба да ги поддржи и да црпи инспирација од бранот мирни протести. Тие се навремен потсетник дека на крајот, од нас како граѓани, зависи да се спротивставиме на неправдата, да ги заштитиме нашите основни слободи и да ја повикаме власта на одговорност“, порача поранешниот американски претседател.
