Централната изборна комисија на Косово (ЦИК) соопшти дека 28 политички субјекти поднеле барање за сертификација за учество на парламентарните избори на 9 февруари, а меѓу нив е и водечката српска политичка партија Српска листа.
Српската листа претходно најави дека ќе учествува на косовските избори. Инаку, пратениците на Српската листа, која од ноември 2022 година ги бојкотира седниците на Собранието на Косово, еднаш на шест месеци се појавуваат во Собранието за да го задржат мандатот.
Од своето основање во 2013 година, Српската листа има добиено над 90 отсто од гласовите на гласачите од српската заедница во речиси сите изборни процеси во кои учествувала. Сепак, таа партија двапати ги бојкотираше локалните избори во општините на северот на Косово по иницијативата од ноември 2022 година Србите да ги напуштат сите косовски институции, вклучително и полицијата и судството, во Северна Митровица, Лепосавиќ, Звечан и Зубин Поток. Причина за ваквата одлука беше инсистирањето на Владата на Косово да ги укине регистарските таблички издадени од српските власти за градовите во Косово. Локалните избори потоа беа бојкотирани од другите српски политички партии, а албанските градоначалници дојдоа на власт во четири општини со српско мнозинство на северот на Косово.
Според соопштението на ЦИК, меѓу 28-те политички субјекти пријавени за учество на изборите до официјалниот рок се 20 политички партии, пет коалиции, две граѓански иницијативи и еден независен кандидат. Меѓу политичките субјекти се и партиите од албанската, српската и другите помали заедници во Косово.
ЦИК мора да ги потврди списоците најдоцна до 25 декември.
Изборите на 9 февруари ќе бидат првите редовни парламентарни избори што ќе се одржат во Косово од неговото прогласување независност во 2008 година.
Опозициските партии долго време бараа предвремени избори, но на почетокот на годинава не успеаја да постигнат договор за тоа како да се одржат изборите. На крајот на мај пропадна иницијативата на најголемата опозициска партија Демократската партија на Косово за распуштање на Собранието и одржување избори. На таа можност се спротивставија уште две опозициски партии, Демократскиот сојуз на Косово и Алијансата за иднината на Косово, кои побараа владата предводена од Албин Курти да поднесе оставка или да биде сменета.
Сепак, на тие две барања се спротивстави движењето Самоопределување на Курти.
