Српската Влада денеска се очекува да усвои заклучок со кој побара од Министерствоито за образование во согласност со своите законски надлежности, да обезбеди зимскиот училишен распуст да се организира подеднакво за основните и средните училишта низ Србија, така што првото полугодие ќе заврши в понеделник, на 23 декември.
Министерството за образование вчера соопшти дека „земајќи ги предвид околностите кои влијаат на квалитетот и зачувувањето на наставниот процес, како и интересот и правото на учениците на образование“, испратило предлог до Владата на Србија зимскиот распуст за сите училишта во Србија да почне во вторник, на 24 декември.
Според заклучокот, планот е второто полугодие да започне на 20 јануари 2025 година.
Распустот на територијата на Војводина требаше да започне на 24 декември, а во остатокот од Србија на 30 декември.
Предлогот на Министерството доаѓа откако матуранти во Србија се приклучија на блокадите на образовните институции, откако студентите на факултетите и на ректорските згради почнаа да го прават тоа пред неколку недели.
Студентите бараат одговорност за смртта на 15 лица во уривањето на бетонската настрешница на реконструираната железничка станица во Нови Сад, ослободување на сите активисти уапсени за време на протестите, како и гонење на оние кои ги нападнаа студентите за време на акциите за оддавање почит на загинатите во Нови Сад.
сите четири репрезентативни синдикати на образованието за денеска најавија прекин на работата и ќе се приклучат на 15-минутната акција за 15-те жртви во новосадската трагедија.
Претседателката на српскиот образовбен синдикат Валентина Илиќ оцени дека со скратувањето на првото полугодие во основните и средните училишта, власта сакала да го осуети протестот на наставниците, но пред се да ги тргне децата од училиштата, додавајќи дека не е сигурна дека таквата одлука би ја смирила ситуацијата.
„Можеби ќе ги тргнат од училиштата, но направија уште поголем проблем, бидејќи децата ќе останат на улица. Особено што родителите почнуваат да застануваат зад своите деца и да се приклучуваат на протестите. Освен тоа, отвора можност за многу поголеми проблеми“, рече таа за денешното издание на весникот „Нова“, коментирајќи го предлогот на Министерството.
Таа изјави дека проблемите се повеќекратни, меѓу кои и тоа што ученицоите нема да добијат заклучени оценки за полугодие
„Воопшто не знам како ќе одржуваме наставнички совети. Нашата цел беше да избегнеме да им наштетиме на децата на кој било начин, да им дадеме можност да ги подобрат своите оценки и да бидат соодветно оценети. Се што сакавме да избегнеме, Владата сега направи“, рече Илиќ, пренесе Бета.
Таа рече дека може да смета на се, но дека не очекувала владата на овој начин да се обиде да ја реши кризата, додавајќи дека в понеделник ќе се состанат репрезентативни синдикати за образование за да се договорат за понатамошните чекори.
