Северна Кореја започна со изградба на фрегата тешка 4.000 тони опремена со вертикален систем за лансирање како дел од надградбата на нејзиниот нуклеарен и ракетен арсенал, тврди војската на Јужна Кореја.
Соопштението на јужнокорејската војска дојде еден ден откако државните медиуми во Пјонгјанг објавија фотографии од севернокорејскиот лидер Ким Џонг-Ун во посета на бродоградилиште каде се гради нов воен брод.
„Северна Кореја гради фрегата тешка 4.000 тони во пристанишниот град Нампо. Со оглед на големината на бродот, се проценува дека е способен да носи ракета брод-земја“, изјави јужнокорејски воен претставник.
Тој додаде дека на Северна Кореја може да и бидат потребни неколку години да ја заврши изградбата на бродот и повеќе од 10 години за тојт да биде оперативно распореден.
Најголемиот севернокорејски воен брод досега е фрегата од 1.500 тони опремена со ракета од брод-брод и нема вертикален систем за лансирање.
