Генералниот секретар на либанскиот Хезболах, Наим Касем, денеска предупреди дека движење би можело да изгуби трпение поради израелските прекршувања на договорот за примирје.
Одговарајќи на критиките зошто Хезболах молчи за израелските прекршувања, Касем во телевизиско обраќање изјави дека раководството на движењето самостојно одлучува како и кога ќе пружи отпор, како и какво оружје ќе користи, пренесува агенцијата Анадолија.
– Може да изгубиме трпение за овие прекршувања, а кога ќе одлучиме да дејствуваме, тоа веднаш ќе го видите, изјави тој.
Касем истакна дека договорот за примирје се однесува исклучиво на јужната област од реката Литани и дека либанската држава, заедно со своите поддржувачи, е одговорна за да го контролира Израел и да обезбеди примена на договорот.
Израелскиот министер за одбрана Израел Кац денеска го обвини либанското движење Хезболах дека не ги почитува условите од договорот за прекин на огнот и предупреди дека неговата земја може да биде „принудена“ да дејствува.
Кац рече дека борците на Хезболах сè уште не се повлекле северно од реката Литани во јужен Либан, на околу 30 километри од границата со Израел.
„Доколку тој услов не биде исполнет, нема да има договор и Израел ќе биде принуден да дејствува еднострано за да обезбеди безбедно враќање на жителите на северот (од Израел) во нивните домови“, рече Кац.
Според податоците на Министерството за здравство на Либан, од почетокот на израелските напади на Либан во октомври 2023 година, убиени се најмалку 4.063 лица, а повеќе од 16.000 се ранети.
Договорот за прекин на огнот стапи на сила на 27 ноември, два месеци по отворената војна меѓу Израел и Хезболах, кој oд судирите излезе значително ослабен, а неговото раководство во голема мерка е уништено.
Според договорот, либанската армија и мировниците на ОН треба да бидат распоредени во јужен Либан, а израелската армија да се повлече во рок од 60 дена. Исто така, се предвидува дека Хезболах ќе се повлече на околу 30 километри од израелската граница.
Од почетокот на примирјето, двете страни меѓусебно се обвинуваат за постојано прекршување.
Ј. Ѓ.
