ВМРО-ДПМНЕ ја прифати денешната иницијатива на опозициските партии СДСМ и Левица за свикување надзорна расправа во рамки на Собранието, на која би се разговарало за мерките и активностите што би се спровеле во насока на подобрување на состојбата со загадувањето на воздухот.
– Ја прифаќаме нивната заедничка иницијатива за надзорна расправа за квалитетот на воздухот. И двете партии се во коалиција исто така и со градоначалничката на Град Скопје, Данела Арсовска, едната во формална, едната во неформална коалиција, си имаат поделено повеќе директорски места. Сметаме дека се направени услови и спремни сме да дискутираме за се што е направено и се што не е направено во изминативе години на полето на амбиенталниот воздух, истакна на денешната прес-конференција пратеникот на ВМРО-ДПМНЕ, Тони Јаревски.
Нагласи дека ќе овозможат дискусија на која, како што рече, ќе имаат можност да дискутираат за сите конкретни планови што Владата ги презема на полето на животната средина.
СДСМ и Левица денеска поднесоа заедничка иницијатива, со која бараат Надзорна расправа за загадениот воздух.
– Врз основа на барањата на граѓаните, на невладините организации и многу експерти коишто работат на зачувување на животната средина, и најважно, врз основа на поразителните резултати коишто доаѓаат за загаденоста на воздухот, покренуваме иницијатива за одржување на Надзорна расправа во Собранието. Да разговараме какви мерки и активности се преземени од страна на владата и на другите надлежни институции. Заради тоа што ова е една од основните функции на Собранието, да преку вакви деловнички и законски инструменти, успееме да седнеме сите на една маса и пред граѓаните да ги отвориме сите прашања, истакна на денешната прес-конференција пратеникот од СДСМ, Оливер Спасовски.
Оваа иницијатива, рече Спасовски, ја покренавме заедно со пратениците на Левица. Сметаме дека борбата против загадениот воздух може да ги обедини сите пратеници во македонскиот парламент.ж
Поврзано:
Спасовски: Поднесовме иницијатива, бараме Надзорна расправа за загадениот воздух
