Поминаа три месеци од несреќата на железничката станица во Нови Сад, а повеќе од два месеци траат протестите и студентските блокади со кои се бара утврдување на одговорноста за несреќата и спроведување на правдата и правата.
Блокадите продолжуваат и денеска, а како што претходно беше најавено, денеска пензионерите ќе протестираат во Трг Република. Работниците на ГСП ( Градско сообраќајно претпријатие) одржуваат предупредувачки протест, а доколку не им се исполнат барањата ќе штрајкуваат. Поддршка за просветните работници ќе биде изразена пред Министерството за образование, а студентите најавија дека ќе бидат и на сите овие протести, јавуваат српските медиуми.
Работниците на Градското сообраќајно претпријатие (ГСП) „Белград“ се собраа на предупредувачки собир во улицата„ Кнегиње Љубице“, во близина на депото „Дорќол“, од каде се упатија кон Градското собрание каде ќе ги изнесат своите барања.
На работниците им се придружија студенти кои извикуваат „Студентите со работниците“ и носат макета од тролејбус.
Граѓаните на собирот носат транспаренти „Протест на работниците од ГСП“, „Бунт е чин на образован човек свесен за своите права – Албер Ками „Бунтовник““, „Студентите со работниците на ГСП“, „Колку е доверлив овој систем“, „Ако ви пречат блокадите, одете со метро“ и извикуваат „Генерален штрајк“.
И од Здружението на педијатри на Србија денеска соопштија дека ги поддржуваат студентските барања, оценувајќи ја нивната борба како надполитичка.
Здружението во соопштението наведува дека изразува почит кон ентузијазмот, социјалната и интелектуалната зрелост и истрајност што академиците ја покажаа во изминатиот период.
Д. Т. / Цивил Медиа
