Украинскиот претседател Володимир Зеленски соопшти дека руските сили изгубиле повеќе од 90.000 војници во последните три месеци, повикувајќи се на податоци потврдени со достапни видео-снимки од првата линија на фронтот.
Информацијата ја сподели по состанокот со Михаило Федоров, актуелен министер за дигитална трансформација и кандидат за нов министер за одбрана, објави Kyiv Independent.
Според Зеленски, во декември биле елиминирани околу 35.000 руски војници, во ноември 30.000, а во октомври 26.000. Тој посочи дека значаен дел од овие резултати се должи на зголемената примена на технолошки решенија во одбраната.
Пресврт во Министерството за одбрана
Објавата за големите руски загуби доаѓа откако Зеленски на почетокот на годината го номинираше Федоров за нов министер за одбрана. Согласно украинскиот устав, назначувањето допрва треба да биде одобрено од парламентот. Федоров би го заменил Денис Шмихаљ, кој на функцијата помина помалку од шест месеци.
На состанокот биле разгледувани очекуваните промени во одбранбениот сектор. Зеленски изјави дека Федоров треба во рок од една недела да подготви конкретни предлог-одлуки насочени кон зајакнување на одбранбените капацитети на Украина.
„Украина е целосно посветена на дипломатијата и сака што побрзо да ја заврши оваа војна. Но, Русија не покажува ист пристап и ја продолжува својата агресија“, изјави Зеленски.
„Ќе одговориме со поголем технолошки напредок и трансформација на одбранбениот сектор“, додаде тој.
Дронови и дигитализација како клучен приоритет
Претседателот нагласи дека технологијата одиграла клучна улога во последните воени успеси. Тој истакна дека има јасен раст на испораката на дронови до воените единици и најави подготовка на нови формати за дополнително зајакнување на дрон-компонентата во одбраната.
Федоров раководи со Министерството за дигитална трансформација од 2019 година и е единствениот министер кој останал на функција во текот на целиот мандат на Зеленски. Тој е познат по концептот „држава во паметен телефон“ и по лансирањето на апликацијата Diia во 2020 година, преку која граѓаните добија пристап до бројни државни услуги.
Под негово водство, министерството учествуваше во проекти поврзани со производство на дронови, дигитална одбрана и образовни реформи, а Федоров одигра и клучна улога во иницијативата Brave1, која ги поврзува Министерството за дигитална трансформација и Министерството за одбрана со цел забрзување на воените технолошки иновации.
Редакција Фронтлајн
