Претседателот на Советот на ЕУ, Антонио Кошта порача дека целосно ја поддржува Европската комисија во обезбедувањето цврст и соодветен одговор на „неоправданите царини“ за увозот на челик и алуминиум во САД, што со одлука на американскиот претседател Доналд Трамп треба да стапат во сила од утре.
– ЕУ е обединета во одбрана на интересите на своите бизниси, работници и граѓани. Ние сме доверлив и предвидлив партнер. Ќе продолжиме да се залагаме за правична глобална трговија, објави Кошта на Икс.
Во продолжение на објавата Кошта ја пренесува и реакцијата на претседателката на Европската комисија, Урсула фон дер Лајен на одлуката на Трамп за воведување царини од 25 отсто на увозот на челик и алуминиум во САД.
– ЕУ ќе дејствува за да ги заштити своите економски интереси. Ќе ги заштитиме нашите работници, бизниси и потрошувачи, наведе Фон дер Лајен, изразувајќи жалење поради одлуката на Белата куќа
Таа додаде дека царините се даноци, кои се лоши за бизнисот, полошо за потрошувачите и на кои ЕУ ќе одговори.
– Неоправданите царини кон ЕУ нема да останат без одговор – тие ќе предизвикаат цврсти и пропорционални контрамерки, потенцира Фон дер Лајен во објавата.
