Првиот астронаут со физичка попреченост е одобрен за мисија на Меѓународната вселенска станица, објави Европската вселенска агенција.
Џон Мекфол, 43-годишен британски хирург и поранешен параолимпиец, кој изгубил нога во сообраќајна несреќа со мотор кога имал 19 години, изјавил дека е „многу горд“.
Откако Европската вселенска агенција (ESA) во 2022 година го објави Мекфол како член на својот тим на астронаути, ESA ја проценувале можноста некој со протеза да стане член на екипажот во вселенска мисија.
Во петокот, ESA објави дека Мекфол добил медицинска дозвола за долготрајна мисија на Меѓународната вселенска станица (ISS).
Мекфол нагласи дека е „релативно пасивен“ во процесот и дека само треба да биде медицински здрав и да ги извршува потребните задачи.
„Ова е многу поголемо од мене – ова е културна промена“, рече тој на онлајн прес-конференција.
Сè уште нема датум кога Мекфол ќе ја добие својата шанса да стане она што ESA го нарече првиот „parastronaut”.
„Сега тој е астронаут како и секој друг кој сака да лета до вселенската станица, чекајќи задача за мисија“, рече директорот на ESA за истражување на луѓе и роботи, Даниел Нојеншвандер.
Соопштението на ESA доаѓа откако иницијативите за различност, правичност и инклузија (DEI) се на удар на новата американска администрација на Доналд Трамп.
„Сега влегуваме во свет кој малку се менува од перспектива на DEI од еден од нашите партнери на Меѓународната вселенска станица“, рече Нојеншвандер.
„Ние ќе продолжиме со нашите европски вредности“, нагласи тој, додавајќи дека сите партнери на ISS – меѓу кои се и Соединетите држави – му дале медицинско одобрение на Мекфол.
Следната фаза од физибилити студијата ќе разгледа дел од потребниот хардвер, вклучително и протетика, за Мекфол најдобро да ги надмине сите дополнителни предизвици во вселената.
Мекфол рече дека технологиите на кои работат „ќе имаат придобивки за корисниците на протези и во поширокото општество“.
Ј. Ѓ.
