Либерално-демократската партија (ЛДП) изрази сериозна загриженост поради одлуката на Република Северна Македонија да се воздржи од гласањето за резолуцијата во Генералното собрание на Обединетите нации, со која се потврдува поддршката за територијалниот интегритет на Украина и се осудува агресијата на Руската Федерација. Според партијата, овој потег испраќа погрешен политички сигнал и ја доведува во прашање посветеноста на земјата кон меѓународното право и евроатлантските вредности.
Од ЛДП нагласуваат дека позицијата на Македонија, утврдена и преку Декларацијата усвоена од Собранието, е јасна: земјата треба недвосмислено да застане на страната на демократијата, правдата и суверенитетот на сите држави, вклучително и Украина. „Воздржаноста при гласањето не само што може да ја наруши нашата евроатлантска ориентација, туку и да ја поткопа нашата заложба за принципите што се темел на нашето членство во ЕУ и НАТО“, се вели во соопштението на партијата.
Како земја-кандидат за членство во Европската Унија, ЛДП смета дека Македонија мора да ја усогласи својата надворешна политика со ставовите на ЕУ, особено во време на глобални кризи. Воздржаноста при гласањето за резолуцијата за Украина, според партијата, е во спротивност со официјалните позиции на Унијата, која цврсто ја поддржува Украина во нејзината одбрана од руската агресија. „Македонија треба да биде доследна во поддршката на демократските принципи, човековите права и суверенитетот на земјите“, истакнуваат од ЛДП.
Партијата, исто така, ја повтори својата заложба за итно ставање крај на војната во Украина и повика на постигнување праведен и траен мир. „Нашиот глас мора да биде во согласност со вредностите што ги споделуваме со нашите меѓународни партнери“, порачаа од ЛДП, апелирајќи властите да ја преиспитаат својата позиција и да покажат поголема решителност во поддршката на меѓународниот поредок заснован на правила.
