Претседателот на Република Српска (РС) Милорад Додик е прогласен за виновен пред Судот на Босна и Херцеговина (БиХ) под обвинение за непочитување на одлуките на високиот претставник во БиХ. Судот на БиХ денеска донесе првостепена пресуда против претседателот на ентитетот Република Српска (РС), Милорад Додик, со која е осуден на една година затвор и шестгодишна забрана за вршење политичка функција како претседател на РС, објави Кlix.ba.
„Судот го осуди обвинетиот Милорад Додик на една (1) година затвор, како и мерка за безбедност забрана за вршење на функцијата претседател на Република Српска во рок од шест (6) години, од денот на правосилноста на пресудата“, соопшти Судот на БиХ.
Милош Лукиќ, в.д директорот на Службен весник на РС е ослободен од обвиненијата.
Обвинителството на Босна и Херцеговина го обвини Лукиќ за олеснување на објавувањето на указите на Додик во Службен весник на РС, пренесоа српските медиуми.
Тој е обвинет дека го продолжил процесот на носење закони со кои било предвидено дека во овој ентитет нема да се спроведуваат одлуките на Уставниот суд на Босна и Херцеговина, ниту пак одлуките на високиот претставник на меѓународната заедница во БиХ ќе бидат објавени во службен весник.
Додик не присуствуваше на изрекувањето на пресудата, како и неговиот адвокат Горан Бубиќ.
Бидејќи се работи за првостепена пресуда, обвинителството има право на жалба.
По жалбите, Апелацискиот совет на Судот на Босна и Херцеговина треба да донесе правосилна пресуда во рок од околу три и пол месеци. Судењето на Додик и Лукиќ е прво судење пред судството во Босна и Херцеговина за кривично дело непочитување на одлуките на високиот претставник.
Обвинителството на Босна и Херцеговина во завршниот збор побара на Додик и Лукиќ да им се изрече затворска казна поблиску до максималната предвидена за ова кривично дело, а тоа е пет години, како и да им се изрече мерка на безбедност забрана за вршење на функција во период од десет години. За Додик престанок на функцијата претседател на РС, а за Лукиќ престанок на функцијата директор на Службен весник.
Д.Т. / Цивил Медиа
