Израелски воени авиони синоќа го бомбардираа градот Кисве, кој се наоѓа на околу 20 километри јужно од сирискиот главен град Дамаск, како и јужната провинција Дара.
Сириски безбедносни извори рекоа дека цел била воена локација, но не дадоа дополнителни детали.
Израелците бомбардираа и град во јужната провинција Дара со дополнителни воздушни напади, јави ТВ Сирија.
Израелската војска (ИДФ) потврди дека нападнала воени цели во јужна Сирија, вклучително и складишта за оружје.
„Присуството на војници и оружје во јужна Сирија претставува закана за граѓаните на државата Израел. ИДФ ќе продолжи да дејствува за елиминирање на каква било закана за израелските граѓани“, објави ИДФ.
Бомбардирањето дојде неколку часа откако Сирија го осуди израелскиот упад на југот на земјата и побара повлекување на ИДФ.
Израел ги пресели силите во демилитаризирана зона под надзор на ОН во Сирија, откако бунтовниците предводени од Хајат Тахрир ал-Шам (ХТС), поранешен огранок на Ал Каеда, го соборија поранешниот претседател Башар ал Асад во декември.
Израелскиот премиер Бенјамин Нетанјаху во неделата изјави дека Израел нема да толерира присуство на ХТС во јужна Сирија или какви било други сили поврзани со новите владетели на земјата и повика на демилитаризација на територијата.
