„Шокиран сум од денешната навреда што министерката за финансии, Кочовска, ја упати кон пратеничката Славјанка Петровска. Нејзината дрска и понижувачка изјава – дека Петровска не може да знае колку троши едно четиричлено семејство затоа што нема деца, ме згрози“, реагира претседателот на СДСМ, Венко Филипче на социјалните мрежи.
На денешната собраниска седница за пратенички прашања, на прашањето на пратеничката Славјанка Петровска до министерката за финансии Гордана Димитриеска-Кочоска за нејзината претходна изјава дека таа не купувала грашок во конзерва и не сфаќа зошто таква храна е ставена во потрошувачка кошничка за 4-члено семејство во која има и 13 литри млеко. Одоговорот од министерката беше крајно навредлив.
Наместо аргументи и дебата во Собранието, сведочиме на лични дискредитации што е, како што напиша Филипче, добро познат начин на одбрана на ВМРО-ДПМНЕ.
„Секогаш кога се соочени со критика, нивниот одговор не е дебата, туку омаловажување“, вели првиот човек на СДСМ.
Тој изрази жалење што „Славјанка повторно е мета на напади“.
„Не така одамна беше жртва на дискредитации и лаги од страна на пратеникот Ковачки. Често сме сведоци и на јавни исмевања и навреди од поддржувачи на ВМРО-ДПМНЕ на социјалните мрежи, дури и на нејзиниот изглед. Тоа е нивната политичка култура – навреди, дискредитации и насилна реторика“, остро критикува Филипче во својата објава и истакнува дека „Славјанка е силна жена и врвен професионалец, човек кој секогаш се однесува со почит кон сите – за разлика од оние што ја напаѓаат“.
Според Филипче, со доаѓањето на ВМРО-ДПМНЕ на власт, „сведочиме на пад на политичката култура и голема нетолеранција кон критиката“. Според него, ако ова е нивното однесување на самиот почеток, во првите моменти на нервоза, можеме само да замислиме што ќе следува.
