По пауза од еден месец, учениците на грчките острови Санторини, Иос, Аморгос и Анафи, денеска се враѓаат во училишните клупи, откако на почетокот на февруари, училиштата беа затворени поради зголемената сеизмичка активност во морскиот дел меѓу Санторини и Аморгос, јави дописничката на МИА од Атина.
На заедничкиот состанок на Комисијата за процена на сеизмичката опасност и Комисијата за следење на вулкански активности во Министерството за климатски кризи и цивилна заштита на Грција одржан во четвртокот, беше донесена одлука денеска да се отворат училиштата, но членовите на комисиите препорачуваат „училишните единици да се придржуваат до мерките на претпазливост од земјотреси, имајќи предвид дека опасноста од некои релативно посилни потреси, иако значително намалена, не е целосно исчезната“.
Дополнително, потсетија на превентивните мерки за граѓаните, односно да ги избегнуваат напуштените објекти; да избегнуваат пристап и престој во пристаништа Амуди, Армени, Крфос и старото пристаниште во Фира; да ги отстранат опасните непотребни предмети на објектите и да ја испразнат водата од базените; да изберат безбедни рути при движењето по градските и локалните патни мрежа, поради опасност од појава на одрони и итно да се евакуираат крајбрежните области во случај на силен земјотрес.
Нов состанок за разгледување на сеизмичката активност во близина на Санторини е закажан за в петок.
Според грчките медиуми, жителите, кои поради земјотресите го напуштија островот, сега веќе се враќаат, а Санторини почнува да се подготвува за претстојната туристичка сезона.
