Методот „4-7-8“, којшто се заснова на древноиндиските техники на дишење – е новото популарно „оружје“ против несоница. Имено, стручњаците ветуваат дека тоа ќе Ве заспие за само 60 секунди.
Истражувањата посочуваат дека бавното дишење, хигиената на спиењето и вежбите за опуштање може да бидат покорисни во лекувањето несоница, отколку некои вообичаени фармаколошки третмани. „Методот на дишење 4-7-8“ е развиен од д-р Ендрју Вејл, лекар во Центарот за интегративна медицина во Тусон, Аризона, САД. Вежбата се заснова на индиските „пранајама“ техники, пишува „Хелтлајн“ (Healthline).
Колку повеќе ја практикувате оваа вежба за медитација, се вели, толку поделотворна таа може да биде во напорите да се заспие полесно. Оваа практика опушта, но и го подобрува начинот на којшто човековото тело реагира на стрес.
Како се прави вежбата „4-7-8“?
Чекор бр. 1: Ставете го врвот на јазикот на непцето – напред и насредина, веднаш зад двата предни заби. Држете ја устата затворена. Стиснете ги и усните доколку е потребно тоа.
Чекор бр. 2: Со затворена уста, вдишете полека низ носот. Бројте до 4.
Чекор бр. 3: Го држите здивот 7 секунди. Ова е најважниот дел од вежбата.
Чекор бр. 4: Издишувате низ јазикот и забите (како со свиркање), во траење од 8 секунди.
Кога повторно вдишувате, почнува сосем нов круг. Тоа се повторува вкупно четири целосни круга, но ако Вие и Вашето тело чувствувате дека опуштањето доаѓа порано, просто – прекинете ја вежбата.
