Во Србија лани се направени рекордни 82,4 милиони купувања преку интернет – во просек дневно над 225 илјади купувања, јави МИА од Белград.
Онлајн купувањето во Србија станува важен сегмент на платежниот пазар кога станува збор за купувањата направени со картички и е-пари, а во претходниот период се забележува континуиран пораст на бројот на онлајн купувања, соопшти Народната банка на Србија (НБС).
Тие прецизираат дека во 2024 година имало за 39,2 отсто повеќе онлајн купувања отколку во 2023 година, кога имало 59,2 милиони такви набавки, додека во однос на периодот пред пет години, во однос на 2020 година, бројот на онлајн купувања минатата година бил за 288,5 отсто поголем.
Според податоците на Централната банка на Србија, од вкупниот број купувања преку интернет од страна на клиентите на давателите на платежни услуги во 2024 година, повеќе од две третини, или 68,5 отсто, биле направени во домашна валута.
На крајот на минатата година, според НБС, бројот на домашни онлајн продавници се зголемил на 4.726, што е за 17,9 отсто повеќе од крајот на 2023 година и за 134,8 отсто повеќе од крајот на 2020 година.
