Министерот за здравство Арбен Таравари вчера на прес-конференција кажа дека на клиниките во Скопје ќе останат само 14 пациенти кои што се лекуваат од повредите во пожарот во Кочани, додека на лекување во странство остануваат 91 пациент. За отварање на Центар за изгореници кажа дека разговарале со директорот на ГОБ „8 Септември“, Ковид центарот да биде пренаменет, но за тоа, вели, дополнително биле потребно човечки ресурси.
-Нови осум пациенти повредени во пожарот во Кочани од скопските клиники се пуштаат на домашно лекување, а деветмина се враќаат од странство, информира вчера тој на прес-конференција.
Осумте пациенти кои вчера требаше да пристигнат, тројца од Унгарија, двајца од Италија и по еден од Атина, Белград и Шведска, според протоколите на Кризниот штаб, ќе останат најмалку 24 часа на скопските клиники на дополнителни проверки. Една пациентка од Бугарија, појасни, веќе е во хотел и оди само на амбулантски прегледи.
– И за четворицата критични пациенти добиваме добри вести, дека иако се сеуште во тешка состојба, но во подобрена во однос на вчерашниот ден. Оптимисти дека и тие ќе почнат да се подобруваат, да нема други компликации. Одредени лабараториски параметри покажуваат дека има подобрување, изјави Таравари.
Тој најави дека денеска треба да се вратат нови двајца пациенти по еден од Литванија и Шведска, а во меѓувреме може да се донесе одлука и за други.
На Клиниката за токсикологија, додаде министерот, има шест пациенти, двајца се на пластична хирургија , шест во стара Градска болница, пет во „8 Септември“ и тројца во приватната болница „Систина“.
Директорот на Клиниката за токсикологија Андон Чибишев појасни дека шесте пациенти кои се на Клиниката во моментот се оние кои завчера се вратија од лекување во странство и оти кај сите токсиколошките анализи биле во референтни вредности.
-Сите се во добра општа здравствена состојба со стабилни клинички параметри. Денеска земавме дополнителни клинички иследувања кои се нормални. Тројца пациенти се со инхалаторни повреди стабилни, другите имаат и инхалаторни и изгореници, кои се во санација, згрижени се. Сите се видени од токсиколог, анестезиолог и психијатар, согласно нашиот став од Кризниот штаб и денеска сите ќе ги пуштиме дома со одредени препораки. Дел од нив ќе треба да дојдат и на котрола во наредните денови, истакна Чибишев.
Таравари уште еднаш повтори дека лекувањето на пациентите од пожарот во Кочани во земјава и странство е бесплатно.
– Ќе повторам за сите пациенти лекувањето е бесплатно. За сите пациенти за двајца членови од семејствата е обезедено авионска карта или ако отишле со друг транспорт и сместувањето. Владата ги покрива сите трошоци на сите пациенти од лекување, престој на родителите и транспорт на пациентите и на родителите во двата правци. Комплетно се е покриено, потврди Таравари.
Финансиска проценка за тоа колку ќе чини процесот на лекување на пациентите во странство Министерството немало, но Таравари нагласи дека пациентите нема да платат ниту еден денар. Деведесет и девет отсто од трошоците, според него, се покриени од државите кои им помогнале, а мал процент ќе покрие Фондот за здравство.
Во однос на недостатоците на здравствениот систем во земјава, тој забележа дека во светот не постои идеален здравствен систем, но и оти покрај наследените недостатоци успеале релативно добро да ја изменаџираат состојбата со пациентите настрадани од пожарот во Кочани, нагласувајќи дека немало мртви по 11 дена од трагедијата. Посочи дека идната недела ќе почнат да се тестираат 200-250 специјализанти, 1.200 медицински сестри и друг помошен персонал, а недостигале и околу 100 амбулантски возила.
За отварање на центар за изгореници кажа дека разговарале со директорот на „8 Септември“, ковид центарот да биде пренаменет, но за тоа дополнително биле потребно човечки ресурси.
На 16 март во кочанската дискотека „Пулс“, во пожар загинаа 59 лица, а над 200 беа повредени и повеќе од половината беа испратени на лекувања во странски медицински центри. Од 2016 година во државава не функционира Центарот за изгореници. Иако тој се уште фигурира на официјалната веб страница на Универзитетската клиника за хируршки болести „Св. Наум Охридски“ – Скопје, во пракса, не постои.
Првиот официјален центар за изгореници во земјава е формиран во рамки на Воената болница во Скопје под раководство на полковник д-р. Крсте Митановски д-р.сци.мед. Центарот е затворен за да се ослободи простор за приватната Кардиохирургија „Жан Митрев”.
Вториот Центар за третман на изгореници е отворен во септември 2000 година во тогашна стара Градска општа болница, односно сегашна Клиника за хируршки болести „Св.Наум Охридски” во Скопје. Во јули 2016 година, Центарот е ставен во функција и во него работеле специјалисти и субспецијалисти по пластична и реконструктивна хирургија.
