Администрацијата на Трамп призна на суд дека депортирала маж од Мериленд во Ел Салвадор поради административна грешка. Тврдат дека повеќе не можат да го вратат бидејќи сега е во притвор во таа земја, пренесе Индекс.хр.
Поднесувањето е дел од судската постапка иницирана за депортацијата на Килмар Армандо Абрего Гарсија, државјанин на Салвадор, кој доби заштитен статус од судија за имиграција во 2019 година, со што изречно им забрани на американските власти да го депортираат. Како што пишува Атлантик, ова е првпат администрацијата јавно да признае грешка во врска со неодамнешните депортации во Ел Салвадор, кои сега се предмет на правна битка.
„На 15 март, иако ICE знаеше дека Абрего Гарсија има налог за депортација во Ел Салвадор, тој сепак беше депортиран – поради административна грешка“, се вели во поднесувањето.
Абрего Гарсија, кој, според неговите адвокати, побегнал од Ел Салвадор пред повеќе од десет години поради закани од банди, сопругата го препознала на фотографија од затвореници кои влегуваат во озлогласениот мега-затвор CECOT.
Пред неговото депортирање, тој беше уапсен од страна на Имиграциските и царинските служби (ICE) во средината на март, кои го идентификуваа како истакнат член на бандата MS-13, според изјавата на висок функционер на ICE. Но, неговите адвокати цврсто тврдат дека тој никогаш не бил член или имал каква било врска со таа банда.
„Поради административна грешка, Абрего Гарсија беше депортиран во Ел Салвадор. Тоа беше превид, а постапката беше спроведена со добра волја, врз основа на постоечката конечна одлука за депортација и наводната поврзаност со бандата МС-13“, се вели во соопштението.
Администрацијата вели дека не може да обезбеди негово враќање бидејќи тој моментално е во притвор во Салвадор и ја отфрла загриженоста дека би можел да биде мачен или убиен во затворот Cecot.
Д. Т. / Цивил Медиа
