Украина денеска ја повика телевизијата Фокс Њуз да се извини и да спроведе истрага поради тоа што за време на известување од Велигденски богослужби главниот град на земјата Кијив го означи како „руски град“.
Како што пренесе Анадолија, повеќе украински медиуми јавија дека Фокс њуз емитувал снимки од Велигденските богослужби што се одржуваат низ целиот свет, вклучително и богослужба во Москва на која присуствувал рускиот претседател Владимир Путин.
Телевизијата, со седиште во Њујорк, исто така, емитувала снимка од богослужбата во главниот град на Украина, кој првично ги означила како „Кијив, Украина“.
Сепак, текстот на екранот подоцна се сменил во „Кијив, Русија“, и така наводно стоел околу 20 минути пред да биде коригиран.
– Ако тоа беше грешка, а не намерна политичка изјава, треба да има извинување и истрага за тоа кој ја направил грешката, напиша на Х портпаролот на украинското Министерство за надворешни работи Хеорхи Тихји.
