Цената на нафтата порасна денеска поттикнатa од повеќе фактори како новите американски санкции против Иран и значителното намалување на резервите на сурова нафта во САД, но и поумерениот тон на претседателот Доналд Трамп кон шефот на Федералните резерви, Џером Пауел.
Фјучерсите на нафтата од типот Brent се зголемија за 1,16 отсто, достигнувајќи околу 68,22 долари за барел, додека американската нафта WTI поскапе за 1,21 отсто, до 64,44 долари за барел.
САД вчера воведоа санкции против иранскиот магнат Сеид Асадолу Емамџомех, кој се занимава со транспорт на течен нафтен гас и сурова нафта во Кина. Санкциите опфаќаат и мрежа на негови компании, чиј промет, според проценките на Министерството за финансии на САД, изнесува стотици милиони долари.
Во меѓувреме, во неделата заклучно 18 април, залихите на нафта во САД се намалија за 4,6 милиони барели, соопштија извори повикувајќи се на податоци од Американскиот институт за нафта (AПИ).
Подоцна денеска треба да бидат објавени и официјалните податоци од Управата за енергетски информации на САД (EИA). Очекувањата на аналитичарите се дека за минатата недела ќе има дополнително намалување на залихите на нафта од околу 800.000 барели.
По серија критики упатени кон Пауел во изминатите денови, Трамп синоќа изјави дека не планира да го разреши раководителот на Федералните резерви. Претседателот исто така навести дека американските царини за увоз од Кина би можеле да бидат намалени, што ги зголеми надежите за пораст на побарувачката на енергенси. Истовремено, кинеското Министерство за надворешни работи соопшти дека САД треба да престанат со закани и принуда доколку сакаат да постигнат трговски договор.
Во меѓувреме, Меѓународниот монетарен фонд (ММФ) во вторникот ги намали прогнозите за економски раст за САД, Кина и повеќето други земји, повикувајќи се на влијанието на американските царини кои се на највисоко ниво во последните 100 години.
