Прилепската болница доби донација амбулантно возило за давање здравствени услуги за потребите на ромската заедница во градот. Возилото е донација од невладините „Целим“ од Милано, Ромскиот ресурсен центар од Скопје и „Рома Перспектив“ од Прилеп, а финансирано од Европската Унија.
Донацијата на возилото е една од активностите во рамки на проектот за обезбедување подобри услови за живеење на ромската заедница во Прилеп, што се имплементира три и пол години. Возилото ќе биде своевидна мобилна клиника и во ромската заедница ќе има основни прегледи најмалку двапати месечно.
-Уште за време на пандемијата направивме истражување за тоа кои се ефектите од Ковид 19 и тогаш произлезе дека голем проблем во ромската заедница е со пристапот до здравствени услуги, па констатиравме дека во болницата е потребно посебно возило. Она што е специфично е дека ова возило не е само транспортно, туку е и мобилна клиника. Со Општината и со болницата договоривме план со кој ќе се овозможуваат основни здравствени прегледи во ромската заедница, најмалку двапати месечно. Тимот од болницата ќе оди редовно да ги спроведува основните здравствени прегледи, а возилото е опремено за тоа, изјави Себитан Демировски, генерален менаџер на Ромски ресурсен центар од Скопје.
Директорот на прилепската општа болница, Кире Јоноски, истакна дека возилото е добредојдено при ситуација од недостиг на амбулантни возила во болницата.
-Во договор со невладината организација ќе направиме скрининг, испитувања на социјално загрозените пациенти. Проектот започна уште минатата година. Поради недостигот а и застареност на амбулантните возила, секако дека возилото е добредојдено. Возилото е целосно опремено со дефибрилатор, ЕКГ- скрининг, за кислородна поддршка и многу ќе помогне, рече Јоноски.
Во Прилеп живеаат околу 5 000 Роми, а има повеќе активности за подобрување на социјално-образовниот и здравствен живот во заедницата. Се работи на донесување на ДУП, на легализирање на целата ромска населба, на подобрување на вработливоста на ромското население, посебно на младите и на жените Ромки.
-Локалната самоуправа останува доследна за реализирање на сите барања, очекувања на нашите сограѓани за да имаат подобар економски и здравствен живот во заедницата, рече прилепскиот градоначалник Борче Јовчески при денешното примопредавање на амбулантното возило во прилепската болница за здравствените потреби на ромската заедница.
