Два одвоени извештаи објавени на 28 април укажуваат дека на Универзитетот Харвард постои клима на антисемитизам и антимуслимански ставови. Извештаите повикуваат раководството на универзитетот итно да преземе мерки за справување со оваа појава.
Извештаите, кои заедно се поставени на неколку стотици страници, се засновани на анкети и стотици сведоштва на студенти и универзитетски кадри собрани од јануари 2024 година досега. Објавата доаѓа во време кога Харвард е критикуван од претседателот на САД, Доналд Трамп, кој го нарече универзитетот „антисемитска и крајно левичарска институција“ и „закана за демократијата“.
Слично како и Колумбискиот универзитет, Харвард е обвинет дека дозволил раст на антисемитизмот за време на студентските протести против израелската војна во Појасот Газа, по нападот на Хамас врз израелска територија на 7 октомври 2023 година.
Првата работна група, составена главно од професори и дел студенти, констатирала дека антисемитизмот и антиизраелските ставови биле „неговувани, практикувани и толерирани“ не само на Харвард, туку и пошироко во академската заедница. Во извештајот се повикува универзитетот да стане лидер во борбата против овие појави.
Вториот извештај, фокусиран на антимуслимански, антиарапски и антипалестински ставови, заклучува дека на кампусот владее „длабоко вкоренет страв“ кај студентите, професорите и другите вработени. Анкетираните лица пријавиле чувство на несигурност, изолираност и нетолеранција.
– Харвард не може и нема да толерира нетолеранција. Ќе продолжиме да ги штитиме сите членови на нашата заедница од вознемирување, изјави ректорот Алан Гарбер, иницијатор на извештаите. Тој најави дека ќе се следи спроведувањето на препораките.
Харвард, најстариот универзитет во САД и еден од водечките во светот, беше првиот што ја тужеше администрацијата на Трамп откако таа замрзна над две милијарди долари федерални субвенции поради одбивање на универзитетот да се потчини на неколку претседателски барања.
Администрацијата на Трамп често го користи обвинувањето за антисемитизам како основа за мерки против високообразовни институции и поединечни странски студенти поврзани со протестите за Газа.
