Легендарниот валцер „На убавиот син Дунав“ од Јохан Штраус II ќе отпатува во вселената на 31 мај, во рамки на прославата на 200 години од раѓањето на композиторот, познат како „кралот на валцерот“, пренесува АП.
Изведбата на делото од Виенската симфонија ќе биде испратена како радио сигнал од антената на Европската вселенска агенција (ESA) во Шпанија, насочена кон правецот на сондата Војаџер 1 – најоддалечениот објект создаден од човекот, кој се наоѓа повеќе од 24 милијарди километри од Земјата.
Истовремено, концертот ќе биде емитуван во живо со бесплатни јавни проекции во Виена, Мадрид и Њујорк. Настанот исто така го одбележува и 50-годишниот јубилеј од основањето на ESA.
Иако постои можност за пренос на музиката во реално време како радио сигнал, од ESA велат дека ќе испратат претходно снимена верзија од генералната проба за да се избегнат евентуални технички проблеми. Во живо, оркестарот ќе ја изведува композицијата паралелно со преносот.
Сигналот ќе патува со брзина од околу 1 милијарда километри на час – брзината на светлината. Со тоа, валцерот ќе стигне до Месечината за 1,5 секунда, до Марс за 4,5 минути, до Јупитер за 37 минути, и до Нептун за четири часа. За помалку од 24 часа, музиката ќе биде на оддалеченоста на Војаџер 1.
Ова не е првпат музика да се испрати во длабока вселена. Во 2008 година, НАСА ја испрати песната „Across the Universe“ од Битлси, а минатата година беше испратена и „The Rain (Supa Dupa Fly)“ од Миси Елиот кон Венера. Во 2012, НАСА испрати песна на will.i.am до роверот Curiosity на Марс, кој потоа ја врати снимката назад на Земјата.
Музиката на Штраус никогаш не била дел од „Златните плочи“ испратени со Војаџерите во 1977 година, кои содржат избрани звуци и музика од Земјата, вклучувајќи дела од Бах, Бетовен, Моцарт и Стравински. Неговата најпозната композиција „На убавиот син Дунав“, која стана културен симбол преку филмот „2001: Одисеја во вселената“ од Стенли Кјубрик, сега конечно добива свое заслужено место во космосот.
„Музиката нè поврзува низ времето и просторот на уникатен начин,“ изјави генералниот директор на ESA, Јозеф Ашбахер. „Горди сме што го споделуваме овој момент со Штраус и ја будиме имагинацијата на идните научници и истражувачи на вселената.“
Зошто валцерот „На убавиот син Дунав“ не бил вклучен на „Војаџер Голден Рекордс“
Процесот на селекција за двете Златни плочи на „Војаџер“, лансирани од Кејп Канаверал (Флорида, САД) во 1977 година, беше ограничена колекција на музички и културни артефакти. Тие вклучуваа 116 слики, природни звуци од Земјата, говорни поздрави на 55 јазици и 27 од најдобрите песни во светот. Имено, ниедна од сондите „Војаџер“ – сега најоддалечените објекти создадени од човекот во вселената – не ја вклучуваше врвната химна на вселената на Јохан Штраус II, „На убавиот син Дунав“.
Едно од можните сценарија зошто не бил вклучен во листата на Војаџер е на видеото во прилог:
Подготви: Ј. Ѓ.
