Американскиот претседател Доналд Трамп веројатно неделава ќе има телефонски разговор со кинескиот претседател Си Џинпинг, изјави синоќа портпаролката на Белата куќа, Каролин Ливит, пренесе ДПА.
Ливит не даде дополнителни детали и немаше непосредна потврда од Пекинг.
Доколку разговорот се одржи, додава ДПА, се очекува лидерите да се фокусираат на актуелниот трговски спор меѓу двете земји. Иако САД и Кина се согласија кон средината на мај да ги ублажат дел од нивните царини, тензиите меѓу двете економски суперсили неодамна повторно се разгореа.
Во меѓувреме, американскиот Сенат работи на нови санкции против Русија. Републиканскиот сенатор Линдзи Греам изјави дека мерките ќе бидат насочени кон земјите што продолжуваат да купуваат руска нафта, гас и други енергетски резерви – потег што би можел силно да влијае на Кина, пренесува германската агенција.
