По вчерашната појава на голема прашина при рушењето на зградата на тетовски Монопол и реакциите во јавноста градоначалникот Биљал Касами вели дека инспектори ја следат ситуацијата. На местото на поранешниот преработувачки капацитет за тутун, ќе се гради нова станбена зграда. Граѓаните и еколошките здруженија споделија видеа на кои се гледа како голема прашина излегува од местото на рушење на објектот и се шири низ градот.
– За реакциите околу рушењето на објектот во Монопол, дојдоа реакциите и до мене испратена општинскиот инспекторат, излезени се на терен. Овие денови ќе имаат извештај за што станува збор и што понатаму, кои постапки ќе се преземат, истакна Касами.
Вчера со соопштение реагираше здружението Еко Герила, а денес и од граѓанската иницијатива „Тетово сака парк“ со порака дека и во овој град треба да има мининални стандарди за современо и урбано живеење како уставно право.
– Граѓаните, сношти тажни затоа што губат последниот јавен простор се соочени и со неможност да излезат надвор од домовите затоа што дебел слој на прашина го објави нашиот град бидејќи не се применуваат ниту во милиметар законските одредби коишто гарантираат како треба ваквите да бидат рушени како треба да се постапува, бидејќи, ваква еколошка катастрофа одамна не се случила во градот и тоа поминува без никаков коментар без никаква реакција од општината, рече Даријан Сотировски од „Тетово сака парк“.
Градоначалникот Касами денес промовираше реконструкција на дел од улицата „Мурат Бафтијари“ во населба Горна чаршија. Делницата од околу 200 метри, според Касами, доби подземна инфраструктура, односно водоводна и канализациска мрежа, нов асфалт, тротоари и осветлување. За обновата се потрошени пет милиони денари.
