Бројките се најрелевантниот показател за политиките што ги спроведуваме и претставуваат смерница за креирање на политиките во наредниот период. Раст на Бруто домашниот производ (БДП) од 3 и над 3 проценти последователно во три квартали е потврда за нашата политика што ја најавивме за стабилизација на макроекономската состојба и можност да стартуваме со политиките коишто ќе не водат кон забрзување на економската активност на домашната економија и повисоки стапки на економски раст.
Ова го истакна министерката за финансии Гордана Димитриеска-Кочоска на прес-конференција на која се осврна на последните објавени податоци за раст на БДП во првиот квартал од 2025 година.
Таа рече дека од почетокот на годината скоро 11 милијарди денари од Буџетот се вбризгани во економијата преку компаниите коишто работат на изведба на инфрструктурни проекти, близу 500 милиони денари кон компаниите кои работат на општинските проекти за кои, исто така, се обебедени средства од Буџетот, над 125 милиони евра за инвестиции на домашните компании преку Развојната банка, како и раст на просечната плата од 10,5 отсто што е поттикнување на потрошувачката и индиректно на економијата и раст на пензиите за 2.500 денари.
Министерката за финасии, Димитриеска-Кочоска потенцира дека станува збор за првични сигнали коишто се поволни и претставуваат показател дека проектираниот раст од 3,7 отсто е остварлив за оваа година и ќе биде мотор за остварување повисоки стапки на раст на среден рок кои просечно годишно би изнесувале 4,7 проценти, а кои ќе базираат на инвестиции и во јавниот и во приватниот сектор.
Државниот завод за статистика, вчера објави дека растот на БДП во првиот квартал од 2025 година изнесува 3 отсто и дека тој се темели на широка основа, со позитивни остварувања во сите сектори.
